مش غاوى كوره
غصبن عنى لازم اتفرج
قاعد فـ البيت أنا وحدانى
وسط عيالى وبنتفرج
على ماتش كوره ما بين فريقين
معرفش مين بيلعب مع مين
والكل قاعد كدا سهتاااان
قدام الشاشه ما بيتحركش
وانا قاعد بينهم تقول غلباااان
زى التمبل وما بتكلمش
وفـ لحظه كان الجو سكووون
وانا كنت نعسااان باتتوب
راح واحد شاط الكوره فى الجون
اتقلب البيت يضرب يقلب
قمت انا مجعوززى المجنون
قلت دا زلزال هايهد البيت
قالولى خلاص احنا غلبنا
والكوره لسه فــ ملعبنا
سيبت البيت ونزلت الشارع
قلت اتمشى انا مع نفسى
رحت مشاور للاوتوبيس
عدى فـ ريحى وماوقفليش
قلت اكمل تانى مع نفسى
لحد ما جانى سواق تاكسى
راح مشاورلى وقالى تع اركب
رايح فين ياسيدنا لفندى
قلت بينا اوام عـ الممشى ..(الممشى كورنيش سياحى على بلاج بورسعيد )
عند الكاستن لجل اتعشى .. (الكاستن سياحى مطعم مشهور ببورسعيد)
اهلا بيك ياسعادة البيه
حضرتك طلباتك ايه
نفسى فى محشى وفـ ممبار
وسمك مشوى ويبقى شبار
بس ياريته اخضر وجوابى
ومبطرخ صايده بسنار
وبعد ما كلت كدا وشبعت
واتمطعت وخدت الرست
جانى الجرسون تانى وقالى
طلباتك ايه تانى يابيه
قلت ادينى قهوه زياده
لجل ما افوق كده زى العاده
حطيت سجايرى والساعه
وكمان وياهم الولاعه
وطلعت سيجاره اولعها
وفـ ايدى القهوه وبشربها
وواحده جميله قاعده قصادى
بتبص عليا وتستغرب
قلت فــ نفسى دى غويانى
رحت الاغيها لجل اتقرب
قمت غامزلها كدا بعنيا
راحت مشاوره لجوزها عليا
اتاريه شحط طويل وعريض
لاعب مصارعه وايده حديد
وهاتك طاخ طيخ طوخ طاخ
وضرب فيا لحد ما داخ
وعدى عليا يوم واتنين
وانا فـ غيبوبه معرفش انا فين
---------------
مع تحياتى
محمود السخيلى
17/4/2008