أه لو أكون بلطجى ياسلام

ياسلام ياسلام ياسلام
لو اكون بلطجى ياسلام
لاخلى الدوله تفلس
والبنك الاهلى كمان
واخطفلى كام بنوته
واحكيلهم كام حدوته
وديتهم تيجى عالنوته
واسرق عربيه كمان
مش لاقى حد يكلمنى
ولا حد قادر يحكمنى
وانزل تلطيش فى الناس

ياسلام يا سلام يا سلام
لو اكون بلطجى ياسلام
لافرد سيطره ع الناس
واقفل كل الشارع
ومن العصريه تنام
واسرقلى كام موتيسكل
وحاموسه وكمان عجل
ومسمعشى دبة رجل
وان شوفت راجل ف الشارع
يبقى ماسمعش كلام
وراح احاكمه  بالاعدام

ياسلام يا سلام يا سلام
لو اكون بلطجى ياسلام
راح ارشح نفسى رئيس
وامنجه نفسى واهيص
وانغنغ كل الشعب
وهزود عــ التموين
للفرد تمن حشيش
والبانجو كمان بقشيش
وهزود فى المخانات
والغرز والحانات
لجل مــ الشعب يعيش

ياسلام يا سلام ياسلام
لو اكون بلطجى يا سلام
لكن لو تغدرو بيا
هاتشوفو منى اسييا
راح ادمر كل الناس
منا اسى ماليش احساس
دموى دنا كلى ازييه
وعمرماها تشوفو حنييه
وان شوفتو اهى دقنى اهييه

ياسلام ياسلام يا سلام
لو اكون بلطجى ياسلام
لاكوون فى العصابات
ونخش فى لنتخابات
وافرض سيطره ع اللجنه
وازور فى الاصوات
فى اللجنه هنطبخ عجنه
وننجح سين بمزاجنا
وان كان حد مش عجبه
هايصبح من الاموات

ياسلام يا سلام ياسلام
لو اكون بلطجى ياسلام
لاكون ثروه كبيره
واعمل ريس حنتيره
واسرح حبة صييع
بسلاح ألى وزخيره
ونقلب مليونيرات
ونهلب عربيات
واللى مايدفعش الفيزه
يصبح من النفايات

ياسلام ياسلام ياسلام
لو اكون بلطجى ياسلام
لا هاممنى من الداخليه
ولا اتخنها مديريه
وفى ساعة القبض عليا
فى ثوانى اكون ع الباب
سهران مع كل الشله
بنتعشى شيش وكباب
ونشيش ف التعميره
ونسكع خمره وبيره
واللى هاينكد عيشتى
راح تبقى عيشته هباب

وياسلام يا سلام ياسلام
لو اكون بلطجى يا سلام
--------------------

محمود السخيلى

15 / 10 / 2013

================

تعظيم سلام للبلطجى

============

تعظيم سلام للبلطجى

شهم ومروه أونطجى

بسطوته ينيم حارات

وبمطوته يثبت بنات

لو حد عارضه

إتوفى مات

تعظيم سلام للبلطجى

تعظيم سلام للبلطجى

درع وأمان للعصبجى

بإشاره منه تموت الوف

وبكلمه منه تضيع حروف

لو مش مصدق روح وشوف

تعظيم سلام للبلطجى

تعظيم سلام للبلطجى

حشاش كمان وأمرتجى

سلاحه ألى ومطوجى

بطلقه منه يموت عميد

وبغزت مطوى يموت شهيد

مهو بلطجى وإيه راح يفيد

تعظيم سلام للبلطجى

تعظيم سلام للبلطجى

إسلوب تناحه وعربجى

وفى الميدان

يظهر كأنه ثورجى

سكر وعربده وخمورتجى

 
تشوفه تقول عليه كريم

يسرق يتحرش بالحريم

مهو بلطجى وصايع لئيم

تعظيم سلام للبلطجى

حرس سلاح للبلطجى

وياعيش ياعيش البلطجى
===============

=============

كلمات / محمود السخيلى

7/4/2013

مبــــــــارك بعد البـــــــراءه .....2

مبارك بعد الراءه

=========

جاتكم خيبه شعب منيل

مين هاتحاكموه بالاعدام

هو انا كنت موكل عييل

كان بيمثل فـ الافلام

وللا انا كنت فاتحها تكيه

لجل ما تنشرها الاعلام

جاتكم نيله ..لا مليون نيله

كنتم فاكرين هاخد كام

طول ما فلوسى ماليه خزاينى

مش راح أشيل هم الاحكام

وارجع تانى اتحكم فيكم

وترجعو زى زمان خدام

وافتح سجنى ومعتقلاتى

وارميى فيها كل الثوار

اوعو تكونو فاكرينى هاهاتى

دانتو عيشتكو هاتبقى مرار

بكرا ولادى حتى مراتى

مش راح ينسو ياخدو التار

جايين بتحاكمونى على ايه

كام واحد مضروب بالنار

وفيها ايه يعنى لما يموتو

وللا نسينو ان انا طيار

مـ الاخر انا غصبن عنكم

ومش بمزاجكم

هرجع تانى لحكم بلدكم

وهالبسكو كلكو طرح

وهازفكو بطبله وزار

-------------------

محمود السخيلى

  25/6/2012

مبــــــارك بعد البـــــــــراءه

يا ترا ياشعب ناوى ترشح مين

المضروب بالكعب وللا المسلمين

صعبان عليا ثورتك

وللا إللى نهبو ثروتك

قوم إنتفض من غفوتك

راح تعطى مين كلمتك

شوف بص مين هترشحه

المضروب بالكعب ترجحه

وللا البعيد هتنجحه

واللا انت ناوى تمرجحه

ممكن أشور عليك وخلاص؟؟

نلعب مابين لتنين الطاس

واحد ملك والتانى كتابه

تكونش فاكرهم لسه غلابه!!

ماتستعجلش ياعم الطيب

بكرا ياسيدى هايبقو ديابه

بس إحنا اللى بقينا خيابه

حبه يمين وحبه شمال

مش هنبطل لعب عيال؟؟

مــ بلاش ضحك علينا امال!!

الريس طبعا معروف

لو ما مصدق بعد الهلمه

تبقى تشوف

أبقى قابلنى

لو مـــلعبهاش

عــــ المكشوف

يادى الكسوف!!!!!

=========

كلمات

محمود السخيلى

12/6/2012

الف سلامه عليكى ياأمـى

ألف سلامه عليكى يا أمــــــــى

مين كان غيرك ها يشيل همى

راح ابوس إيدك فى يوم عيـــدك

وادعى المولى يارب يزيــــــــدك

صحه وعافيه وراحـــة بـــــــــــال

شايله همومنا وحمل جبــــــال

راح اعمل كفى ليــكى منديــل

من قبل دموع الطاهره تسيـــل

وامسح بيها دمع عنيكـــــــــــى

دا نتى البركه اتبارك بيكــــــــى

زى ما وصى رسولنا عليكـــــى

دا باب الجنـه تراب رجليكـــــــى

وادعى يا طاهره فى كل صلاتى

يخليكى المولى ويحميكــــــــى

الف سلامه عليكى يا أمــــــــى

مين كان غيرك هايشيل همــى

-------------------------------

الكاتب .. محمود السخيلــــــى"

 

25/11/2010

 

 

 

 

 

 

تعظيـــــم ســــــلام للبلطجـــــــى

تعظيم سلام للبلطجى 

شهم ومروه أونطجــــى 

بسطوته ينيم حـــــارات 

 وبمطوته يثبت بنات

ولا حـــــد قادر يزجـــــره

 حتـــــــــى إن قـــــــــدر

اتوفـــــــــى مــــــــــــات 

 لا شرطه قادره تردعـــه 

 ولا جيش يهوب يمنعــه 

 اصله فتوه وعصبجــــــى

سكر وعربده وامرتجـــى

 

 أحسن سلام للبلطجى

 تعظيم سلام للبلطجـى

=========

محمود السخيلى

7/4/2013

 ------------------------- محمود السخيلى 7/4/2013

متغربين

ياحـــاملين قلوبنا

يامفارقيــــن البيـــــــــت

ياترا ماشيين غلـــــــط

وللا انــــا اللى مشيـــت

أيامنـــــا كـــــــانت فرح

أيام ما كان فيه نـــــاس

الوقت القلب اتجــــــرح

ولا عادش فيه إحسـاس

يامــا أسيت منكـــــــــــم

وفـ بعـــدى انــــا مليــــت

القســــوه مــن طبعكــــــــم

أسيـــــت انــا مانسيـــــــت

أمــــانه مـــا تطـولـــــــــــو

فى الغربـــه يا احبـــابنــــا

عــــــذاب بيتحمـــلـــــــــــو

قلوبنــــــــا واشواقنـــــــــــا

-------------

كلمات..محمود السخيلى

24/4/2013