January 30, 2015

من أجمل مساجلاتى..مع نخبه رائعه من كبار

شعراء العاميه المصريه..حتى لا تضيع

فى طى النسيان ..عن قصيدتى

((شوفت البنت الحلوه جارتنا))

------------------

الشاعر الجميل رضا الغمرى

........

ايه العظمه دى يامعلم

حبك حرفك فيه تتكلم

بتسبح فيه ومعاة بتسلم

اكسر قله وهى تسلم

-----------------

محمود اسخيلى

......

قبل ماشوفها كنت مبلم

شوفت جمالها أنا قلبى اتألم

مش راح اسيبها مهما هايحصل

وبعد العمر دا .كله نسلم؟؟

-------------------------

================

االشاعر الكبير/ مدثر الخياط

.........

كسرت قله .كسرت زير

كل كلامك حلو جميــل

ادبح لينا عجــل كبيــر

بالنقطه تلقانا جـــايين

--------------------

محمود السخيلى

.......

راح اعمل زفه انا فى التحرير

وادبح عجل وجوز زغاليل

وموصى الجزار على قطه

اصل عاروستى دى وزن تقيل

------------------------------

=================

الشاعر الجميل حماده النخيلى

.......

جميلة يا حودة شكل القلة

فى إيد الحلوة بنت حارتنا

حرفك رائع حلو الطلة

خدنا لغاية بيتها وبيتنا

============

محمود السخيلى

........

أعمل ايه ياحماده ياصاحبى

مرت جمبى سرقت قلبى

طلعت حراميه وعجبانى

أعمل ايه أه يانا ياغلبى

---------------

شاعرنا الجميل/حماده النخيلى

---------

أمَّا صحيح الهوى مكْتُوب

دَوِّبْ قلبك فيها دوب

طعمِ الهوى حَراقِ يا خال

الحُبِ دا غالب مُش مغلوب

---------------

محمود السخيلى

-----------

والله يا صاحبى انا منهم أتوب

واقفل قلبى وناوى هروب

واعيشلى يومين.. مرتاح البال

أهو باقى م العمر.. يـــادوب

------------------------

الشاعر الجميل/حماده النحيلى

......

خير ما هاتفعل بس بسرعة

إخلع واهرب مـِ الشِباك

شمس الحب يدوبك طالعة

إغسل قلبك فيها هناك

نار الحب ف قلبها والعة

مهما تروح راح تيجى وراك

----------------

محمود السخيلى

.......

إيدى على إيدك والناس سامعه

هخلع واهرب بس معاك

دا كل فلوسى جوه الزلعه

هاتها بسرعه انا هستناك

إياك ست الكل تشوفك

بإيد الهون راح تجرى وراك

وساعتها..أنفد انا بجلدى

واخلع واهرب م الشباك

...............

January 30, 2015

======================