قائمة المدونات الإلكترونية

السبت، يناير 16، 2010

يــــوم فــ مخـــــــــانه

مره ف يوم انا كنت بحشش ويا صحابى جوه مخانه

صاحب الغرزه دا راجل مجدع قام ويانا بكل امانه

جاب ترابيزه وجهز هلنا وكمان جوزه كانت مليانه

وهات تقطيع ف حشيش ويوزع على مساطيل قاعدين ويانا

وجاب الجوزه وشد نفسها اصل الجوزه كانت عمرانه

حط الجوزه على الترابيزه وجاب الماشه ورص معسل

ورص الفحم على التعميره وحجر الجوزه دا كان متعسل

اما صاحبنا دا كان متسلطن جمب الحيطه كدا ومكسل

بعد ثوانى اتشقلب حالنا حتى دماغنا كانت خربانه

وهات ياهزار مع ضحك ولعب وطبل وزمر عقول هربانه


ونقول تريقه على بعض ونضحك منا معرفش مين اللى معانا

بعد هزارنا ... قل مزاجنا وقرش حشيش فاضل ويانا

قلنا نعمر تانى الطاسه وكان فيه شيخ قاعد ويانا

بعد شويه كان فيه كبسه على مخانتنا وبهدلوهلنا

جت عربيه وفيها كام مخبر دخلو الغرزه وشقلبوهلنا

وظابط الكابسه كان مش عاجبه مـ اللى بيحصل ويا اصحابنا

شيخ كان ماسك الجوزه يحشش قدام ظابط ولا على بالنا

اصل الجو دا كان متشبر مـ الدخان ولا واخدين بالنا

قال للظابط لو فيه حرمه احنا كده بنحرق مالنا

ولو الشرع محللهالنا يللا اتوكل ما تزعلنا

مش ناقصينك يللا اتمشى دانتا يادوبك قد عيالنا

ضحك الظابط من عمايلنا ولم عساكره وسابنا ف حالنا

وادى حكايه الشله بتاعتى كل يومين مع بعض نحشش

جوه مخانه ف ناصيه حاره اصل صاحبها راجل متريش

فكر مره معانا تحشش هنخليك علطول متفرفش

خدلك كدا نفسين ع الماشى تلقى مزاجك بقى متنعنش

وتنسى الدنيا وتنسى همومك وتحس انك ملو هدومك

حشش واحبس بقى وادعيلى وقوللى ازاى هتكمل يومك

دا انتم عايشين ف التوهان وعيشتكم مليانه جنان

لو مره انا قاعد وياكم عمرى ما احس ف يوم بامان

دانتم كدا جبتولنا العدوى فيروس سى وكمان سرطان

وإنسى انى ف يوم اجاريك والجأ مره ف يوم انا ليك

لو تعرف ايه معنى الصحه كنت تكلبش فيها باديك

فكر مره تصلى ف يوم وادعى كدا ربنا يهديك

بدل النيله اللى بتشربها ادبحلك فرخه تغذيك

كدا علطول هتحس بقيمتك والصحه راح ترجع ليك

============
مع وافر تحياتى
محمود السخيلى
s@meh_415
29/9/2008

رســــــــــاله حــــــــــــب

رساله أكتبها
من راسى ف كراسى
سطورها ملياها حروفى
ومن خوفى مابكتبشى
ولا أكدبشى
دى كلمه صدق جراحه ودباحه
مافيش راحه
ولو كان الثمن قلبى
ومتخبى
جواه الحذن متعبى
أقول يمكن يجيلو يوم
ويصفالى
أنا خايف ليخلا بى
ويبعد تانى ولا أشوفه
ومن خوفه
يدارى الحذن من جوفه
وأنادى عليه
مايسمعنى
وقلبى جووه يوجعنى
أقول يعنى
منا ألغلطان
مسيره يروق ويرجعلى
وأرجعله
ويرجع فرحنا تانى
ومن تانى
نعيد الفرح والبسمه
تطير أحلامنا وترفرف
كما العصافير
على الشجره بين أغصانها
عش جميل
وعملاهابكومه قش
ولا تتعبش
أطير ونطيربجناحتنا
وفرحتنا ماتتقدر
ياريت أقدر
يوصل لها صوتى وتسمعنى
ما تجرحنى
ونرجع زى ماكنا
زمان بينا
تقول الآهه أتألم
مابتكلم
أسمع أنينهاجوايا
ودمعايا
مخبياها أنا جفونى
وفى عيونى
حنين وشوق لحبيبى
ودا نصيبى
إللى طال بعده
وخلا بييا
ياريت كلامى يوصل له
ويقوله
كفايا بعاد كفايا عناد
ماتعندشى
ومتقدرشى مسيرك يوم
هترجعلى وتسمعلى
وهسمعلك
وتحكيلى وهحكيلك
ويحضن قلبنا الدافى
حبنا الوافى
ياريت حبيبى تسمعنى
وترجعلى
ماتوجعنى
كفايا بعاد كفايا عناد
ماتعندشى

=======
مع تحياتى
s@meh_415

الإعـــــــــلام التـــــــايه

مره ف يوم انا كنت بصلى
صلاه الفجر ويا جماعه
جت عربيه وفيها كام مخبر
وحاصروا المسجد بكل فظاعه
وكام عربيه نقل ولورى
وكام دبابه ومدرعه
قلت فى إيه هو احنا ف حرب
وللا احنا احتلينا إزاعه
إحنا يادوب خلصنا الفجر
واتلمينا مع بعض ف ساعه
وخدونا على أهل الدوله
مش عارفين إن احنا وداعه
داحنا يادوب م البيت للجامع
حتى اللقمه ما بندوئهاش
فجر وضهر وعصر ومغرب
وعشا ووتر ما بنسبهاش
هى جريمه إن احنا نصلى
فرض الله مانفوتهاش
مش غاويين لا قهاوى ولا كوره
طاوله وكومى ما بلعبهاش
سايبين ناس عماله تهلب
تسرق تنهب ما بتهداش
وهى صلاه الفجر جماعه
عند الدوله تبقى جريمه
والله انا خايف يوم اتهور
بدل المسجد ادخل سيما
افلام عنف وجنس دعاره
ماليا السينمات أه ياخساره
وكمان مغنى قالبه دماغنا
وطبل وزمر نعيق وجعاره
طول المغنى يقول ف البانجو
والبرشام وحشيش ف سيجاره
ياأهل الدوله سيبونا ف حالنا
وللا انتم فاكرينها شطاره
وجرايد عماله بتكتب
فى كلام فارغ مش فاهمينه
قتل وسرقه ونهب وخطف
وخبر بايت مش عايزينه
فاكر إن احنا عقولنا تفاهه
مش فاهمين عن مين كاتبينه
ناس لها تقل كبير ف الدوله
وخبر عنهم ليه كاتمينه
والله ياناس اعلامنا اونطه
مش عارفين ان احنا ف ورطه
انا خايف اعملها فضايح
وف لحظه ياخدونى على طنطا
يا أهل الدوله سيبونا ف حالنا
انا رايح اصلى ف مالطه

=======

مع تحياتى
s@meh_415

شـــــــــــــبــاب مروشــــــن

كورنيش الشط دا كله عجايب
إتمشى عليه وياماهتشوف
إتنين إتنين كله حبايب
قاعدين ع الشط مكانه معروف
صبيان وبنات ودا شيىء عادى
لا فيه احترامات ولا حتى كسوف
قاعدين لازقين ولا فيه ساتر
ولا عاد فيه دم ولا عاد فيه خوف
بوس وأحضان والذى منه
وإن قلت دا عيب عمرك مقصوف
فى ساعتها تشوف إيه يجرالك
وكلام مرصوص مش على بالك
غير الإهانات وشتيمه بالكوم
توصل للضرب وقطع هدوم
لو كان فيه نظام او في مراقبه
ما كانش يبقى الحال معدوم
ولا فيه بوليس ولا فيه تإمين
ولا حتى عساكر دوريه
يحموا الماشيين او القاعدين
من الصايعين والشلاليه
رايحين جايين نازلين تأليس
على البنات بالملاغيه
بالذمه ياهووو بقه دا إسمه كلام
الناس إزاى تعرف تمشى
كدا ف الكورنيش او ع الممشى
ولا فيه تأمين ولا قسم بوليس
والمخبرين مش لاقيينهم
يمكن(حاطاكاباظا)والله ما عارفين
ياخساره يابلد كان فيكى الولد
قبل ما يتولد بيسموا عليه
واهو ياما نشوفولا عادش كسوف
كدا ع المكشوف بندلع فيه
يطلع خيبان ودا ف التوهان
حتى التعليم مش فالح فيه
مش لوفيه متابعه من رب البيت
او حد كبيردا يكون إضمن
لو هما صغار أو حتى كبار
لو تخاويهم كان يبقى احسن
إبنك تخاويه وإياك تعاديه
ودايما تحاكيه عن احواله
يمكن تعبان يمكن زعلان
من حب جديد غير حاله
ودايما تراضيه وتصالح فيه
لو كان زعلان من خلانه
وتكون مرتاح كدا من حواليه
طول ما إنت متابع احواله
وإنت الكسبان منتاش خسران
دول مهما ان كان يبقوا ولادك

========================
مع تحيـــــــــــــــاتى
s@meh_415

شــــــــبـاب لولاكـــــى(شبان كتير)

شبان كتير ماشيه تبحلق
بتبص لفوق
طول ما انت عمال بتبرشم
عمرك ما تفوق
اسمع كلامى دى مصلحتك
عايزك انسان
صحصح كدا وروق بالك
ما تكونش جبان
شبان كتير وبنات ياما
قاعده تشييت
قاعدين ع النت بيرغوا
ويقولوا فى كلام
سارحين على بعض يقولو
فى كلام بايت
كلام مضروب ومتكرر
كل دا اوهام
تلقى الشباب كدا ع القهوه
قاعدين بالكوم
ولا عادش فيه شغلانه تنفع
ولا شغل يدوم
هو احنا كدا ياهل بلدنا
بنحمى شبابنا
كتر البطاله ايد بطاله
بتزيد عن يوم
لو كان بايدى انا اشغل
مليون انسان
وافتح مصانع وابداها
حتى بدكان
دى بلدنا والله خيرها كتير
بس ندور
ولا عادش نقبض فى رشاوى
ولا هنزوور

==========
مع تحياتى
s@meh_415

نفســــى باعــالم يــوم اتــلم

نفسى ياعالم يوم اتلم

نفسى ف يوم ينزاح الهم

عشت كتير وصبرت كتير

وعلى أد ما عشت طفحت الدم

نفسى ف شقه واكولها بدقه

بس الشقه محتاجه زقه

سنين بتمر علينا بتجرى

واحنا بنجرى كمان وياها

فات ايام وسنين بتعدى

مش عارفين اخرتها معاها

شعرنا شاب وعقلنا غاب

فاضللى يومين وانسى الاحباب

وانسى العشره وانسى الصحبه

وانسى إن احنا لسه شباب

مش لاقيين شغلانه تنفعنا

مش لاقيين حد يشجعنا

نفسى ف شغله أتكون منها

نفسى يكون مسئول يسمعنا

كل مسابقه اتقدم ليها

القى هجوم وخناقه عليها

وارجع تانى مكسور الخاطر

والعن كل مسئول فيها

مش كان احسن كرسى ف جامعه

ولا مرمطه وصياعه ف الشارع

بعد سنين العمر الضايعه

إتخرجنا بلقب

ص اي ع


===============

مع تحياتى
محمود السخيلى
s@meh_415

9/5/2009

نـــاس ونــــــــاس

ناس تهلب وناس تقلب

وناس جيوبها منفوخين

ناس تلطش وناس بتلطش

وناس خدودها متنفخين

ناس بتسرق وناس بتنهب

وناس عامله مفتحين

ناس تبحلق وناس تبرق

وناس عيونها مفنجلين

ناس تهرج وناس تبلطج

وناس خايفه مرعوبين

ناس بتعلا وناس بتوطا

وناس قاعده مبلمين

ناس بتعطف وناس بتخطف

وناس بتاخد بايمين

ناس تهلل وناس تولول

وناس بتلطم بالايدين

ناس بتعيا وناس بتمرض

وناس بتصرخ م الانين

ناس بتاكل وناس بتشبع

وناس بطونها خويانين

ناس ديابه وناس غلابه

وناس بتضرب فـــ السمين

ناس معانا وناس معاهم

وناس تايهه مابين لتنين

ناس تقرب وناس تغرب

وناس مدوبها الحنين

ناس بتسهر وناس بتسكر

وناس قاعده متييسين

ناس بتاخد وناس ما تدى

وناس ماتعرف إنت مين

ناس بتهرب وناس بتجرى

وناس إديها متقيدين

ناس بترشى وناس بتوشى

وناس غلابه مش لاقيين

ناس بتشكى وناس بتبكى

وناس مدوبها السنين

ناس وناس

ناس وناس


========

مع تحياتى
محمود السخيلى
s@meh_415

1/10/2009

إنتخبــــونى لســـــــداد ديـــــــونى

تصور إن فيه جمعيه تعاونيه تابعه لاحدى الشركات إنتخابات اعضائها (أسخن وأمر) من انتخابات( مجلس الشعب )والكل بيتهافت على ترشيح نفسه(لعضويه الجمعيه) وطبعا حضاراتكم عارفين السبب إيه( المنافع والمكاسب الماديه) من عمولات الصفقات الخارجيه وارباح الجمعيه (وما خفى كان اعظم)
============
نفسى فـ مره ارشح نفسى
نفسى ياعالم اسد ديونى

قلت مافيش غير الجمعيه


وانتوبقى اللى هتنتخبونى
نفسى ياعالم مره اترشح


واخد قرض من الجمعيه
واخد رز وزيت وبقاله


ماهى خلاص هتبقى تكيه
وانظف نفسى واهندم لبسى
وبعد يومين اركب عربيه
وافتح ليا حساب فـ البنك
ومع زملاتى اعمل جمعيه
ما أنا خلاص ضمنت الكرسى
كلها كام يوم واعمل صرفيه
وانهب منها كام ملطوش
واعمل منها مصلحه ليا
وارستأ نفسى واشوف مصلحتى
واعمل زى اللى كانو قبليا
كان ارباح الناس فــ كراشهم
وصرف ونهب فلوس شهريه
غير عمولاتهم واختلاساتهم
وكمان نهب فلوس نقديه
وبعد صاحبنا ما كان مديون
رشح نفسه وسد ديونه
خدلو عموله كدا كام مليون
من بعد ما كان الفقر زبونه
فين ارباح الكحك ياعالم
فين ارباح اللحمه ياهووو
هى حلاوه المولد خلصت
وللا انتم فاكرينها جاتوه
كل مواسم السنه اهى عدت
فين ارباحها انتو اكلتوه
ارباح الناس قاسمينها ما بينكم
فين ارباحنا انتو لهفتوه
بعد ما كان رجليه كدا حافيه
الوقت بيلبس كلاركس
والقمصان لابساه بالعافيه
والوقت بيلبس (x4) فور إكس

وعجـبـــــــــــــــى

========

مع تحياتى
محمود السخيلى

s@meh_415
5/10/2009