قائمة المدونات الإلكترونية

الاثنين، أغسطس 30، 2010

قالوا بتحب مصر؟



-----------

قالوا بتحب مصر؟ انا قولت ليه أخبى



دى مصر دى دونيتى وحبها فـ قلبى



لو مر عليا يوم ماعطتلهاش ودى



أفضل حزين مهموم ومين شيل ذنبى





قالو بتحب مصر؟ أنا قلت من قلبى



أعشق تراب أرضها واصون أنا عرضها



ياما إرتويت من نيلها وفـ عينى انا أشيلها



ما فـ الدنيا مثيلها من طولها لعرضها





قالو بتحب مصر ؟ ومين حبها أدى



مشتاق أنا لنيلها



فـ الغربه أحن لها



لو مره أغنى لها



بدموعى على خدى





قالوا بتحب مصر ؟؟؟ أى والله بحبها



لو فكر مين يهينها ويدنس ارضها



ما يمر يوم فى عمره وأتاويه فى بطنها



دى مصر هى أمى وأنا حته منها





قالوا بتحب مصر؟؟؟ ومين فيكم حبها



مش ناس كروشها وارمه من كتر نهبها



فـ الجد ما تلاقيهم وتدارى وشها



أنا مهما أكتب وأألف ما اوفيها حقها





قالوا بتحب مصر ؟؟ ومين ما حبهاش



قبل ما تسئلونى إسئلوا مين فيها عاش



عاش وإتربى فيها وإن هاجر حن ليها



وتقولوا ما حبهاش دنا عمرى مانسيتهاش





قالو بتحب مصر؟؟ أنا قلت مش كتير



عليا حبها... بفلبها الكبير



وعطفها الغزير ... وجوها العليل



دنا أبوس إديها وأجرى أترمى فـ حضنها



وتشيل الهم عتى وتحمينى بعطفها



وتقولى بتحب مصر !!!



يبقى إنت أكيد قسيت مــ الغربه فـ بعدها





قالوا بتحب مصر ؟؟؟ مين قال غير كده غبى!!



دى مصر أرض الكنانه.. ووصى بها النبى



تجير من لجأ ليها .. وتحمى جواريها ( الجار )



أموت واندفن فيها .. دا أملى ومطلبى





قالو بتحب مصر؟؟؟ سؤال وجيه



وأقولك سيب غيرك يسألو



مصر مهد الحضاره من خيرها بيكبرو



مناره لكل العالم بعلومها بيوصلو



وجاى الوقت بتسأل إنت بتحب مصر !!!!



أيوا ياسيدى وبعشق ترابها فـ كل عصر



واللى مش عاجبه يرحل وان كان ساكن فـ قصر



دى مصر أم الدنيا واللى مش عاجبه نزعلو



========



مع تحياتى



محمود السخيلى
s@meh_415



31/7/2010


الأحد، أغسطس 15، 2010

أموت فـ الدلع وأحب الشقاوه

أموت فـ الدلع



وأحب الشقاوه



واتوه فـ الدلال



وادوب فـ الحلاوه



تعدى عليا



ضاربها طناش



تغمزلك عنيا



تقولى بلاش



أقولك تعالا



تقولى يحنن



أعشق جمالك



يالهوى يجنن



الرمش الكحيل



والخد الحنين



الخصر النحيل



والشعر المزين



الوجه الجميل



والوش المدور



لو مره تميل



على قلبى العليل



بنظره منك



أو حتى إبتسامه



تعدى كأنك



تمر بسلامه



من صغر سنك



حافظلك علامه



عـ اخد اليمين



تحت العنين



مرسومه بشامه



===========



مه تحياتى



محمود السخيلى
s@meh_415



22/6/2010














رباعيـــــــات ساخره

سايق علينا الدلع

أصل الدلع مش ليك

مرارتى منه إتفقع

مش لايقه حتى عليك

أدعى عليك تنخلع

ومـ العبط يشفيك

وعجــــــبى

============

أه منك يازمن

حكمت فينا التخين

معلوف ومن غير تمن

بينحل فـ السمين

وشامم ريحة عفن

أصلك إيه غير طين

وعجـــــبى

=========

كفايه عليك غير كدا

أخرك حزام ولجام

محناش ناقصين عربده

دا عايزله بنط لحام

لا إدينا متقيده

محناش وش إقسام

وعجــــبى

============

قالو إيه خلعك ... قلت بتاع السنان

قالو ليه دلعك ... قلت أصل أنا خيبان

قالو إيه صنعتك ... قلت الخبط عـ البيبان

قالو إيه وصفتك ... قلت ندل وجبان

قالولى أمنيتك ... أموت مفجوع وأعيش عريان


وعجـــــــبى

==============

مع تحياتى

محمود السخيلى
s@meh_415

23/3/2010

أيام زمان


أيام زمان تلقى الدكان جمب الدكان

ما كانش فيه ناس طماعه ولا فيه غلبان

لو حد من الجيران مديون أو كان تعبان

فى ثوانى نعمل جمعيه يسد ديونه

والوقت الناس ضرباها طناش

والغلبان فى خبر كان


وعجـــــبى

==========


مع تحياتى

محمود السخيلى


5/1/2010

الثلاثاء، أغسطس 10، 2010

شوفت البنت الحلوه جارتنا


شوفت البنت الحلوه جارتنا

بتملا القله من ميتنا(بتشرب ميه من قلتنا)

روحت أنا قاطع عنها الميه(روحت انا خاطف منها القله)

وقلت اعاكسها قدام بيتنا(راحت حادفه القله فـ بيتنا)


ولما شافتنى ضربت لخمه

راحت ماشيه فـ وسط الزحمه

ييجى عشرين تلاتين قول مييه

حتى الناس راح منها الرحمه


بنت جميله وحلوه وطعمه

تاهت منى فـ وسط الزحمه

بس قولولى ياناس فين هييه

على خدها مرسوم فيه وحمه



مر يومين وتلاته وأكتر

ونا سرحان فـ جمالها بفكر

صدفه شافتها عينى معديه

قلت أتجرأ انا واتشطر


روحت وراها ورامى سلامى

راحت جريت من قدامى

فى ثوانى قامت مخفيه

يمكن لخبطت انا فـ كلامى



بعد يومين اتنين وتلاته

شوفتها واقفه ويا شحاته

عماله تحكى معاه وملهيه

واختى بهيه دى تبفى حماته


أصل شحاته صاحب دكانه

من كام يوم ممسوك فـ مخانه

عمال يشرب فيها ويحشش

خادله يومين حبس فـ زنزانه


قلت أهى فرصه اروح واتقرب

واحكى معاها قبل ما تهرب

قلبى خلاص إتشعلق بيها

شوفت جمالها أنا قلبى إتكهرب


إنتى موافقه اتقدم ليكى

شايف الفرحه ماليه عنيكى

يبقى خلاص لأبوكى حتقدم

واشترى شبكه تملا إديكى


أخدت شحاته واختى بهيه

وروحنا لبيتهم ف السبتيه

نطلب إيدها ونقرا الفاتحه

ومـ عانا شبكه بألف وميه


شافنا أبوها رحب بينا

فى ثوانى قعدت جمبينا

عينها فـ عينى علطول بصالى

إسمك إيه ماتقول يا أخينا


أول مره أكون مكسوف

أخطب واحده وش كسوف

أصلها طبيعيه وعجبانى

يمكن تتغير حـ نشوف


كفايه كدا طولت عليكم

محروج والله انا من معاليكم

أنا حـ عزمكم يوم عـ الزفه

وهاتو النقوط إللى عليكم

================

مع تحياتى

محمود السخيلى

s@meh_415
8/8/2010