قائمة المدونات الإلكترونية

الاثنين، فبراير 15، 2010

صعــــــــــبان حبيـــــــــــــبى بعـــــــــــــادك

صعبان حبيبى فراقك

صعبان حبيبى البعاد

سئلت عليكى الصبايا

لفيت عليكى بلاد

لا حد جاوب سؤالى

ولا عاد يفيد عناد

سالت عليكى الودع

حتى الودع ما فاد

قلبى عليكى اتوجع

والقلب ماله زاد

تعالا حبيبى ف حضنى

ارجع عشان خاطرى

يهون عليك حبنا

بكيت عليك عمرى

خلاص نسيت ودنا

عشت الاسى وحدى

بنادى عليك تسمعنى

ارجع تعا ودعنى

ارجع بلاش الاسى

قلبى عليك اتنسى

سايق عليك حبنا

رجع تانى ودنا

وتنسى الاسى بينا

وتبعد الحزن عنا

ونرجع تانى ماضينا

ونحقق كل امانينا

ياريت حبيبى تسمعنى

وترجع ليا ارجعلى


============

مع تحياتى

s@meh_415

ماتت قلوب الناس 0000 ماتت فينا النخوه


ماتت قلوب الناس0000 ماتت فيها النخوه
ومعدش فيه احساس 0000 معادش فيه رحمه

طفل رضيع بيموت 0000 والتانى بيفرفر

واشلاء كتير ع الارض 0000 والدم متبحتر

اصحى ياعرب وفووووء 0000 اصحى الله لا يسيئك

شوف اللى بيحصل فوق 0000 من قبل ما يصيبك

جبان وف ايده سلاح 0000 بيدببح ف المساكين

وف غزه وف لبنان 0000 ولا ننسى دير ياسين

واغتالو الرنتيسى 0000 وقبله الشيخ ياسين


وماتت قلوب الناس 0000 ماتت فينا النخوه

ومعادش فيه احساس 0000 معادش فيه رحمه


خلاص نسينا الدره 0000 ونسينا اللى جراله

ومروان البرغوتى 0000 خطفوه من وسط عياله

وشباب زى الورد 0000 ع الارض وممدد

من اسرائيلى جبان 0000 بيضرب وبيهدد

ودى ام مسكينه 0000على ابنها بتبكى

جسمه بينزف دم 0000 ولمين غير ربها تشكى


وماتت قلوب الناس 0000 ماتت فيها النخوه

ومعادش فيه احساس 0000 معادش فيه رحمه


حتى بنات العرب 0000 هتكو اعراضها

سحبينها من شعرها 0000 والتانى بيضربها

ومنظر انا شوفته 0000 قلبى انفطر منه

على طفل يعينى صغير 0000 مييت ف حضن امه

ودى قاعده جمب الحيط 0000 بعد ما هدولها البيت

لا فرشه تنام عليها 0000 ولا حته تئو يها

واطفالها نايمين ع الارض 0000 ودموعها ف عنيها

وتبص فوق ف السما 0000 وتشتكى لربها


وماتت قلوب الناش 0000 ماتت فيها النخوه

ومعادش فيه احساس 0000 معادش فيه رحمه


فيها ايه لو العرب اتحدوا 0000 وبقينا ايد واحده

ونعرف كل الناس 0000 ان العرب اخوه



----------------------------------------------

مع تحياتى لكل عربى حر اصيــل 0000 بيغير على عرضـــــه

s@meh_415

بــانـــــــــــورامــــــــا لـــــــــــيله شـــــــــم النســـــــيم


شم النسيم هل ابوابه

عــ البورسعيديه يفرحهم

تلقى اللى جاى ويا اصحابه

من كل حته يجمعهم

من قبل ما يهل بكام يوم

نعمله ظيطه وهليله

ونحضر الرنجه مع التوم

وبصل وفسيخ مع تبتيله

وتلقى الشباب بيلف يحوم

على كل حته وبيدور

على كام كاوتش وكام صندوق

مع عفش قديم كدا ويكسر

خشب صناديق وسرير ودلاب

وحجات قديمه مهيش منظر

وعلى السطوح قاعدين جايبين

هدوم قديمه وبنخيط

قمصان بناطيل مع كام فستان

نعمل المبى كدا مظئلط

قبل الوليعه كدا بكام يوم

نعمله زفه وكام ظيطه

ونلف بيه كل الميادين

ومعلقينه كدا ع الحيطه

ونزفهم زفه عروسين

بين الشوارع والحاره

ومربطين كدهه بحبال

ما بين عماره وعماره

يوم الوليعه دا يوم معروف

كل الشباب فيها مستنى

على النواصى وبين لبيوت

والكل واقف بيهنى

مستنيين اول اشاره

من كل شارع او حاره

اول اشاره نولعها

والكل واقف حواليها

ساعه ما بيشوفها المخبر

تيجى المطافى تطفيها

وساعه ما يمشو احنا بننزل

نلف الشوارع وحواريها

وف كل شارع أو ناصيه

ناصبين صيوان حواليه حبال نور

جايبين فرق عاملين ضمـــــــــه

حوالين النار بنلف ندور

مع الاغنى الشعبيه

تلقى الشباب واقفين اسبور

وتانى اشاره نولعها

تلقى الالمبى مولع نار

اصل الالمبى دا كان ظالم

ايام ما كان فيه استعمار

ومورهاوس ده احنا خطفناه

ف عربيه سوده وتوهناه

وف جربين احنا تاويناه

واغنيا حزينه غانيناه

مورهاوس ليه بس اجيت

من لندن هنا واتعديت

وف تاكسى اسود خطفوك

واهى موتتك جت جوه البيت

مورهاوس ليه بس اجيت

من يومها كانوا الثوار

فدائيين ورجال ابطال

بورسعيديه ودمها فوار

وسيرتهم على كل لسان

وصورهم ماليا البنيان

تلاقيهم فى كل مكان

طولت عليكم معليشى

اصل دى قصه ماتتسابشى

نرجع ونكمل سهرتنا

مع الاغانى الشعبيه

وكل الفرق جاييه تهنى

من السويس واسماعليه

كابتن غزال دا عارفينه

وكامل عيد رمز بلدنا

نسهر معاهم للصبحيه

ف شارع عباده 000 والتلاتينى

واوجينا وحجر دليسيبس

للصبح ونحجز شمسيه

وكفايه كده بقى عليكوا

استنونى ف الحلقه الجاييه

هكتب كلام كتييييير ما تعد

عن ام الصوى واحوالها

على البلاج رايحين جايين

هى وجارتها وولادها

ان شالله دايما كتاباتى

تمروا عليها كدا يوماتى

واستنونى السنه الجايه

ان شالله يارب ان كان فيه عمر

فى شم النسيم اكتب تانى

كلمات جميله وعجبانى

ولكم منى تحياتى

وسلاماتى واحتراماتى

---------------------

s@meh_415

هـــاخــدهــا غـصـــــب عـــــــــنك

ياحلو انت ياللى

يالبسه الطرحه توللى

وعنيكى بتسبللى

وسايقه علينا الدلال

مش شايف حد قدك

دا الغصن بان قدك

والورد على خدك

مفيش زييك مثال

لو كنت شوفت ابوكى

واكلم ليه اخوكى

وليا يخطبوكى

يا بنت الحلال

كل يوم يعدى

ادوب يا ناس ف ودى

مش لاقى حد أدى

يطول كل المنال

اشوف مشيك يجنن

عنيكى تقول يحنن

اقول لنفسى يمكن

اسمع رن الخلخال

لو مره تحن عليا

بنظره حلوه ليا

وايدك لامسه ايديا

حقيقه مش خيال

هبوسك غصب عنك

وحضن هاخده منك

وان قلت لا هزنك

دا جد مش هزار

هتصرخى مش هسيبك

هتهربى فين هجيبك

انا من نصيبك

طول عمرى ف انتظار

هستنى كلمه منك

مقدرش استغنى عنك

تروحى بعيد هاجنك

عليكى انا بغــــار

===================
مع تحياتى

s@meh_415

منافسه ومبارزه شعريه فى الرد على مشاركه

الاخوه الافاضل دى كانت بعض الردود على مشاركه ليا فى منتدى اخر وهى عباره عن منافسه او مبارزه شعريه بينى وبين مشرف المنتدى وهو من احد الشعراء السوريين المعروفين وانا ما زلت فى انتظار الرد بتاعه واتمتنى انها تعجب حضراتكم


================================================

ziad sattah
مشرف المنتدى الروحي تاريخ التسجيل: May 2005
الدولة: zaidal

طَب يـ َ حبيبي مـ َ كان ملـ أوِّل ... ليه تحرَقْ قلبَك و فلوسَك


قبل مـ َ شــوفَك كِـدا متدَهْوِل ... دُسها قبل مـَ هيّ َ تـْدوسَك


يـ َ ابني يـ َ سامح إسمع منّي ...أصّل الصّحّه دي أكبر نعمه


سيب الشّيشه تعيش متهنّي ... تِلقى الـدُّنيا جميله و طِعمه

=================================


s@meh_415
عضو تاريخ التسجيل: Jun 2009
المشاركات: 13



والله كلامك حلو وزين **** بس انت هتعرفنى منين


انا طبيت مـَ خلاص ووقعت ****ولا نعرف اخرتها لفين


لو كنت ساعتها هتنصحنى **** كنت سمعت نصيحتك ليا


لكن انت جيت متاخر **** والادمان بقى لازم ليا

==========================================


ziad sattah
مشرف المنتدى الروحي تاريخ التسجيل: May 2005
الدولة: zaidal
المشاركات: 1,109


إيـه يعني وْ لو جـِت مِتْأخَّر ... مش أحسن مـ َ تـْجيش مِن أصلو


يـ َ ابني, حبيبي العمر اقْصَيَّر ... ليه نغرق بين أصلو وْ فصلو


جرَّب كَدا شوف حجم ارَدْتَك ... مرّه اتْنين وِ تَلاته و اكثر


أصل إرَدْتَكْ هيّ َ شهادْتَك ... جَرَّب خَلّي المارد يِظْهَر

============================================


sameh_415
عضو تاريخ التسجيل: Jun 2009
المشاركات: 13


وهى شهادتى اللى هتنفعنى **** ولا ارادتى اللى هتمنعنى


نفسى الكيف مره يودعنى **** ويسبنى فــ حالى مــَ يزعلنى


مــَ انا طلقت الجوزه خلاص **** طلقه اتنين وتلاته واكتر


وللا انت بقيت مفتى خلاص؟ **** وبقيت احسن منى واشطر

=================================


ziad sattah
مشرف المنتدى الروحي تاريخ التسجيل: May 2005
الدولة: zaidal
المشاركات: 1,109

مين قَلـَّك: أنا أحسن مِنَّك ... دَنا يـ َ حبيبي شَعَرْت فـ ْ غِيره


دي الجّوزه مش للّي فـ ْ سِنَّك ... إبعَثْهالي بْسُرعه كْبيره


هوَّ العمر دا فيه ايه يعني ... غير تعميره و جوزه و شيشه


يـ َ أضَيَّعها يـ َ تـْضَيَّعني ... كدا كدا مش نافعه التَّحويشه

======================================

sameh_415
عضو تاريخ التسجيل: Jun 2009
المشاركات: 13



ف الأول كنت بتنصحنى **** ومعرفش إنها كانت غيره


وانا قدك وإنت كدا ف سنى **** مايكفينى ولا ميت تعميره


والله انا خايف ليضيع عمرك **** م نفسين حاميين تشربهم


إعقل وإهدى وطول بالك **** شقى عمرك حجرين يحرقهم


=================================


sameh_415
عضو تاريخ التسجيل: Jun 2009
المشاركات: 13



بقى بعد النصح إللى إديتهولى **** جاى تطلب منى التعميره


دا إنت يادوبك أد عيالى **** بنفس واحد تبقى خميره


بص لنفسك ولمصلحتك **** لسه العمر طويل قدامك


حط فلوسك بين محفظتك **** أنا حاسس مش هو كلامك

====================================


ziad sattah
مشرف المنتدى الروحي تاريخ التسجيل: May 2005
الدولة: zaidal
المشاركات: 1,109



و انا أعملـَّك ايه يـ َ حبيبي ... وِجََنابَك عايز ايه دلوَقتي؟


أصلَك بِتْسوق فـ ْ تعذيبي ... وِ بْتِعمِل سَهران على راحتي


وِ لاّ خَلاص بَقيت انتى بْتنصَح ... كِدا لله فالله بِبَلاش؟


عايز شيشه لـْوَحدَك تِطْفَح ...عَلَشان برضو مـ َ تِهْدِنِهاش


==========================================


sameh_415
عضو تاريخ التسجيل: Jun 2009
المشاركات: 13



أنا خايف لـَ الجوزه تجرك **** بعد مـَ كنت بتحلم بيها


إوعى ف يوم الصحه تغرك **** دَ انت يادوبك تلعب بيها


والله انا خايف يابنى عليك **** لـَ الجوزه تعشش فِ دماغك


دَ تُمن حشيش إللى يخليك **** تِّدهوِل وِتْحَمر صَِِداَغك

================================


ziad sattah
مشرف المنتدى الروحي تاريخ التسجيل: May 2005
الدولة: zaidal
المشاركات: 1,109


طـَبْ متشكّر أوي يـ َ عنيـَّى .... مش عايز شيشه ولا بـْتاع


هـَرجـَع للفول و الطّعميّه .... وِ معاها شــــــــاي بالنّعناع

(-؛_؛-)
===============================================

sameh_415
عضو تاريخ التسجيل: Jun 2009
المشاركات: 13



أيواً كدا خليك على أدّك **** إوعـَ تفكر مرََّّّّّه تِشَيِّش


الشيشه راح تقطع نَفَسك **** عايزك كدا مبسوط متريش


خليك فـِ الفول والطعميه **** أخرك كدا شاى بالنعناع


باين عليك فـَ لست فـِ شِعرَك **** وللا كلامك مِنَّك ضاع

=======================

مع تحياتى

a@meh_415

فى تكريم إعتزال مسعد نور ( الكاستن )

من مؤلفاتى القديمه ( 21/2/1986)
بالمصادفه وانا بقلب بدفاترى القديمه وجدت هذه المقتطفات

اتمنى انها تنول اعجاب حضراتكم

والله يامسعد رحت يامسعد


كنا زمان نتمتع بيك


جوه الملعب بره الملعب


زى الكوره ما بين رجليك


وتشوط شوطه تيجى فـِ الجون


تقلب قلبه نهييص ليك


والله يامسعد دَ إنت المسعد


زى ما قال كابتنا لطيف


والله يامسعد فيه كام مسعد


د َ إنت ولا مليون حريف


================

مع تحياتى
محمود السخيلى
s@meh_415
21/2/1986

الجزء الثانى فى( رثاء الراحل// الحاج سيد متولى)

حبك مالى تمللى قلوبنا

وكل جمايلك شايلنهالك

عمر ما إسمك تاه عن بالنا

حتى عواطفك فاكرينهالك

إيدك سابقه كمان احسانك

كل الناس زعلانه علشانك

تمللى قريب فلبك طيب

تحسن تعطف حتى ان هانك

انت التل انت المتولى

هموم الناس شايلها تمللى

كنت تمللى كريم ويانا

كنت بتحلم تبقى معانا

لما يكون المصرى بيلعب

خارج ارضه تمللى بتتعب

شايل هم فريق جمهوره

جوه الملعب فاهم دوره

والله يا تل احنا خسرناك

وعند المولى استعوضناك

مين راح يملا النادى مكانك

زى ما كنت مابين خلانك

=========

(إنا لله وإنا اليه راجعون ولا حول ولا قوه إلا بالله العلى العظيم)

أسكن الله الفقيد فسيح جناته

اتقدم بالتعازى لشعب بورسعيد العظيم

ولجمهور النادى المصرى

محمود السخيلى

طنش فيه ولا تسألش

ياعم سيبك ولا تسألش

طنش وإفرح ولا تزعلش

سيبو يغور محناش ناقصينو

ولا تتعبنا ولا تتعبش

ليه راح تسأل عنه ليه

إيه كان عمله نفرح بيه

طنش وانسا مش عايزينو

يمكن مات نترحم فيه

كلمنجى وكلامه كتير

وكلامه من غير تفكير

طبعا انتم كدا عارفينو

لو ما ظهرش انا هكسر ز ير

===========
s@meh_415