قائمة المدونات الإلكترونية

الخميس، يناير 21، 2010

عـ الطبــليــــــــــــه

ع الطبليه انا هعزم نفسى

بس إنشالله ما تكرشونيش

وعلى الصحبه الحلوه بمسى

نفسى فـ أكله ما تكسفونيش

نفسى فـ طبخة حله محشى

أكلها لوحدى غير التحبيش

ويا اللمه الحلوه ناكلها

عـ الطبليه داير مايدور

ويا الصحبه الحلوه انا هقعد

والاعضاء المحترمين

والزوار ويانا هتسعد

ما حنا كلنا بنى أدمين

عـ الطبليه الكل هايقعد

يكتب يقرا ومش خايفين

يكتب كل كلام هيقوله

حتى ولو هنعدى بحور

عـ الطبليه اللمه الحلوه

راح نتعرف على بعضينا

نسمع لحن ونسمع غنوه

ونسمع للى يدور حوالينا

من اخبار ورياضه وحكمه

ومواهب راح تظهر فينا

كلمه ناسيها انا نفسى اقولها

عـ الطبليع نحط بخور

نمنع عين الحاسد منها

ونلف عليها داير مايدور

والف تحيه والف مباركه

لمؤسسها عادل ماندور


=========

مع اجمل وارق تحياتى للمه الحلوه اللى حوالين الطبليه

s@meh_415

كان ليا حبيب(طقطوقه)

كان ليا حبيب حبيته زمان

كان لما بيشوفنى يزقطط

كنت أمشى وراه

وارميله كلام

يسمع كلامى بيتعفرت

دا كلام معسول

ومن قلبى بقول

ليه لما انا ببعد

يتنطط

أتاريه بيحس

إللى بحسه

واسمع انينه أنا

من حسه

دا حبيبى ونور

قلبى وعينى

لو روحى ترضيه

عنه ما أعزه


‏_‏__________

مع تحياتى

s@meh_415

قلبى الحـــــــيران ( طـقـطـــــوقه )

كان قلبك ماله

زعلان من إيه

سايق فـ دلاله

دا شاغلنى عليه

من يوم ما قابلتك

وإنت ناسينى

وبنار الحب

إنت كاوينى

ما تقول فيه إيه

زعلان من إيه

لو كنت نسيتنى

أنا ما نسيتك

إنا مهما إن كان

برضو حبيبك

الكلمه الحلوه

بقولهالك

والبسمه الحلوه

شايلهالك

قلبى الحيران

مشتاق لعنيك

وهكون زعلان

لو يإسى عليك

متقول فيه إيه

زعلان من إيه

==============
مع تحياتى

s@meh_415

اللــه يرحم نســـوان زمــــان

أيام زمان كانت الستات لابسه الياشمك

لو مره بصيت نحيتها بسرعه تشاكلك

والوقت كل الستات خارجه فارده ضفاير

وجوزها قاعد عـَ الأهوى يلعب شيش يك

أيام زمان تلقى الستات لبسه ملايه لف

لو حد زعلها بكلمه نفسها تتعف


والوقت ماشيه بتترقص شعرها طاير

وعنيها على شاب مروشن نفسها تتزف

أيام زمان العفش يادوب ز ير وحصيره

سرير وكنبه ومرتبه قطن وتصويره

والوقت تلاجه وبوتاجاز طقم ستاير

وعريس مريش فـِ البنك فلوسه كتيره

فاتحه وحنه وكتب كتاب بعدين دخله

خلخال وحلق واسورتين وكمان دبله

والوقت شبكه من الأماظ حلوه خطيره

وفـِ الأخر تطلع شعنونه وكمان هابله

حسره عليك كدا يابن الناس علطول غلبان

حتى فـ جوازتك مـِ الهابله تطلع خايبان

طلقها وارمى عليها يمين فضها سيره

مـَ حلاها عيشة العزوبيه إنت الكسبان

===========
مع تحياتى

s@meh_415

عـــائله تجنــــــــن(زجل ساخر)

فى عندنا أبله تخينه

تاكل وتشرب فـِ طحينه

تطحن وتعمل فـِ عجينه

تعجن ولا تحط خميره

ولا ميه ولا ملح ولا دقيق

وعندنا أخ لها شقيق

أسناذ رياضى بدون تعليق

فلقه توم توئم لتنين

إتنين ما جابتهم وللاده

وواحد كمان عنده عياده

عياده ولا كل العيادات

عـَ الباب تمرجى من ابو زعبل

يضرب ويشخط فـِ العيان

فـِ إيده كرباج وعصايا

يضرب ولا يرحم تعبان

وهناك كمان أخ مهندس

عـَ الناصيه واقف بيألس

يسهر ويسكر ويهلس

وفـ أول الشهر يفلس

ويمد إيده لخلق الله

=========

مع تحياتى

s@meh_415

15
/1/1986


من مؤلفاتى القديمه

مشروع التـــــوكتـــــوك (فى بورسعيد)


والله انا نفسى اشوف التوكتوك


مالى بلدنا ليل ونهـــــــــــــــــار


ولا تحتاج للتاكسى يعـــــــاندك


طول السـكـــــه والمشـــــــــوار


وان وقفت التــــــاكسى يقــــولك


رايح فـــين إيـــــــاك تختــــــــار


قولو إختــــــار انا ويا سيادتـــك


أنا ويـــــاك فيــن ما تودينــــــــى


دانتـــا الأســـــطى وانت الباشا

مين غيـــــرك هيطلع دينــــــى


مـــالو التوكتوك حلو مظـــــأطط


مش هيزاحـــم أسـطى فـ شــــارع


ولا ســـواق تـــاكسى يتـــــــنطط


ولا أوتوبيس يجـرى ويســـــارع


ولا عسكـــــرى مرور متعفــــرت


يقـدر يرفع إيـــــدو ويصــــــارع


اصل التـــــوكتوك حــلو مــأطــأط



وبيتــكلم هنـــــــــدى وصــــــينى


نفسى التــوكتوك يملا الشــــارع


ولأى مكـــان هــــو يوديــنــــــــى


ليـــه ما تخللــــى الغلبـــــان يرزق


وهو التــوكـــتوك وش مشـــــاكل


مش محتـــاج مقطـــــوره ولا زق


ولا محتـــــــاج واير أو شـــــــاكل


ممـكــــــن يدخـــــل أى مــــــــــدق


يقـف لســــت كبيــــره او راجــــل


نفسى فـتوكــتوك كــــدا على قــــدى


أقضى بقـيـــت عمــــرى وسنـــــينى


ولا ســـــــواق تــاكسى يزعـلــنـــى


وبالتوكتــــــوك راح اســـدد دينــــى


وعـجـبـــــــــــــــــــــــــــــــــــــى

============


مع تحيــــــــــــــــاتى


s@meh_415

أحـــــــــلى قصـــــــــه حـــــــــــــــب

زمان زمان وانا صغير


العب ع الشط ف رملته


ارسم عروسه على الرمله


تمسحها الموجه بميته


وف مره وانا برسم صوره


قابلتنى بنت اموره


صغيره كدا من سنى


قالتلى ارسم معاك وتعلمنى


ومن يومها واحنا بنتقابل


عـ الشط وبإيدها تمسكنى


واسمها يشبه اسمى


ارسم صورتها تعاكسنى


بالرمله وبميه البحر


ترشنى وتطلع تجرى


وتقول لو شاطر امسكنى


اجرى وراها وملحقهاش


كنا يوماتى بنتقابل


ساعه العصارى ومابننساش


ونغنى غنيوه جميله


لسه حافظها ومانسيتهاش

(يماما بيضه ومنين اجيبها


طارت يانينه عند صاحبها)


ومره وانا برسم عـ الشط


استنى البنوته مـ جيتشى


وعدى يوم واتنين حيران


قلقان عليها اوى وزعلان


معرفش ايه اللى مانعها


ولا حتى فين عنوان بيتها


وكل يوم امشى على البحر


افتكر ايامنا الحلوه


ايام تعدى سنين بتمر


الشعر شاب وتاه العمر


وف مره قاعد وحدانى


سمعت صوت كدا ف ودانى


بتغنى غنيوه جميله


بتقولها وتعيد من تانى

(يمامه بيضه ومنين اجيبها


طارت يانينه عند صاحبها)

بصيت لها م الفرحه بكيت


وقالتلى انا عمرى ما نسيت


ايام ما كنا صغيرين


ومسكت ايديها انا ومشيت


ع الشط ونجرى ف رملته


ونرش بعض بميته


ونرجع ايامنا الحلوه


ايام ما مكنا صغيرين


ونغنى مع بعض الغنوه


(يمامه بيضه ومنين اجيبها


طارت يانينه عند صاحبها


وخطفها البلبل وطار وياها


اصله يا نينه يعرف لغاها)

=============


مع تحياتى


s@meh_415

أجمـــــــــل واحـــــــــــلا عروســــــــــــــه

الحلوه دى مين


ودى جايه منين


ست الستات


سكر نبات


اسقوا الشربات


هيصوا ياولاد


لأحلى البنات


فين زغروده


دا الجمال خده


غصن بان قده


ايوا مين قده


حلو على قده


بعيونها سحراهم


وجمالها كيداهم


اخرتها وياهم


منوره الزفه


كتبوا الكتاب


وعلوا الجواب


اسقوا الشربات


زغروده يابنات


مبروك ياعريس


زين ما اخترت


اخترت الحلوه الاموره


ادب وجمال


ولا كان ع البال


هتفوز بالحلوه السنيوره


دى بنت اصول


حسب ونسب


دايما على طول


اخلاق وادب


افرح يا عريس


اتهنى وهيص


اهه جالك ونيس


اه مين قدك



مبروك عليك ياعريس

ياريتنى اكون زييك

اجيب منين ونيس

واعمل فرح زييك

لكن دى قسمتى

كان نفسى اكون زييك


=============

اهداء الى سنيوره المنتدى
الاخت /هوبى


=========

مع تحياتى

s@meh_415

لأ مـــــــــــش انــــــــــا اللـــــــــــى أبكـــــــــــــــى

لأ مش انا اللى ابكى 000ولا انا اللى اشكى



لو جار عليا هواك



ومش انا اللى اجرى 000واقول عشان خاطرى



وانا ليا حق معاك



====================
======================



لو كنت يوم اعرف000ان ألأسى منك



ما كان دا حالى معاك



ضحيت انا بعمرى000وسنين كتير تجرى



مش فارقه حاجه معاك





انت اللى بدات تهجر000وتخون حبى وتغدر



عمرى ما أصفى اليك



خساره فيك حبى000كان ليه تخون قلبى



وانا قلبى ملك اديك





انا اللى اعطيتك000كل الحنان منى



وتنكر حبى اليك



بكرا هتبكى دموع000وتتمنالى الرجوع



صدقنى مش هسأل فيك





وعايزنى ارجع ليك000وتقوللى مشتاق ليك



مشتاق للمس اديك



خلاص انسى اللى بينا000وانسى اللى كان بينا



عمرى ما هرجع ليك





اياك فاكرنى هلين000وللا فاكرنى مين



ضيعت عمرى معاك



فاكرنى هنسى اساك000وانسى عذابى معاك



وانت اللى ظالمنى





هنسى انى حبيتك000واتمنى ما رأيتك



كان يوم صعب عليا



والوقت بتبكى دموع000وبتتمنالى الرجوع



وجاى تتندم ليا





خلاص انسى000انسى انى ارجع ليك



خلاص انسى 000انسى00قلبى ما يتفع ليك



خلاص انسى000انسى00حبى ما يشفع ليك



مهما تبكى000000ومهما تشكى



عمرى ما هرجع ليك




انســـــــــــــــــــــــــــــــــــــــــــــــ ـــــــــــــــانى




=======================



مع تحيــــــــــاتى



s@meh_415

الاستقبال & الاهمال & الاستهبال(فى المستشفيات)

مره دماغى ف يوم وجعتنى

قلت اروح ع الاستقبال

شوفت حاجات متجيش ع الخاطر

ولا تخطر ابدا على بال

شوفت اتنين راسهم مفتوحه

وايديهم مربوطه بحبال

قلت اتطقس عن احوالهم

واعرف عنهم اى سؤال

الاتنين اصحاب ف الشارع

علشان بنت اتنافسوا عليها

عدت مره ف يوم قدامهم

واحد منهم شد اديها

والتانى واقف مش عاجبه

طلع مطوه كان مداريها

والاتنين ف ثوانى اتعاركوا

علشان بنت ما حد مربيها

نرجع تانى نشوف حكايتنا

ع اللى بيحصل ف لستقبال

مفيش تمريض ولا حتى نباتشى

ولا دكتور قاعد شغال

ودا عيان ف الطرقه بينزف

ودا واقف مسنود بعيال

حتى الاوضه القاعدين فيها

شكلها يقرف م الاهمال

ارض قذاره وقطن وشاش

وحقن مرميه مفيش عمال

تكنس تمسح ودى شغلتها

امور بلطجه شغل استهبال

لو كان فيه مسؤول يحاسبهم

ماكانش يفضل على دا الحال

كنت تلاقى الكل بيجرى

واتبدل من تانى الحال

=========
مع تحياتى

s@meh_415

دمــــــــــــوع النـــــــــــــدم(ارحمنى حبيبى)

إرحمنى حبيبى وطمنى

وإحكيلى إيه غير حالك

ساكت ليه مََتكلمنى

وقوللى إيه شاغل بالك

أشوف دموعك تإلمنى

معرفش إيه إللى جرالك

تملَّى دايما تهجرنى

وانا قلبى مشغول علشانك

أمسح دموعك تجرحنى

وجروح كتيره داويتهالك

بسمه عنيك بتفرحنى

ولمسه إديك ما نسيتهالك

كتر الجفا بيعلمتى

إن الاسى من أفعالك

حبيبى ليه دايما قاسى

تجرح عواطفى وإحساسى

ومهما كان أنا قلبى شَرِِِيك

وإنت إللى قلبك ليه ناسى

قلبى وروحى أنا ملك إديك

وإنت اللى راسمه ف كراسى

قلب كبير مرسوم حواليك

خايف عليك من حراسى

ومهما كان أنا قلبى كبير

هاييجى يوم فيه ويسامحك

وبرضه أنا قلبى لسه أصيل

هينسى جرحك وعمايلك

ونرجع تانى لأحلامنا

وننسى عذابنا وألامنا

ونحقق بالحب أمالنا

ويعود الفرح لأيامنا


=========

مع تحياتى

s@meh_415

يــــــــــــــــــارب إشفيلى عن حبيبى

بكل إسم سميت به نفسك

بكل حرف مكتوب على عرشك

بكل نظره عطف لعبدك

إشفيلى عن حبيبى

لو كان بإيدى انا اداوى جروحك

حذن ف عنيك بيدارى دموعك

قلبى ف هواك يتمنى رجوعك

إدعى يـــــارب إشفيلى حبيبى

نظره عنيه فيها ليا عتاب

حسيت بإن ف عمره غيــــــــــاب

يــــــــــــــــــــارب انت حليم تواب

إشفيلى عن حبيبى

اسمع انينه بقلبى ادوب

فاضل ف عمره شويه يادوب

يــــــــــــــارب إشفيلى عن المحبوب

إشفيلى عن حبيبى

فى كل اهه منك الم

فى كل دمعه حذنك ندم

وكل فرح ما بينا اتهدم

يــــــــارب إشفيلى عن حبيبى

عمال يوماتى اصبر فيك

وانا بس مين بيصبرنى

بقلبى وروحى انا والله افديك

واهديك كمان سنين عمرى

لو كان بكايا عليك يرضيك

كنت ابكى عليك بقيت عمرى

بقلبى وروحى انا والله افديك

وادعى كمان ربنا يشفيك

يــــــــــــــــــــــــــــــــــــارب

إشفيلى عن حبيبى

===============

مع تحياتى

s@meh_415

الصــــــــــــــــياد والســــــــــــــناره

انا صياد وسنارتى

طاعمها بحته من قلبى

يعدى الحلو من جمبى

تقوم تغمزلى سناره

وف الحاره

اشوف خطوتها تدلع

وعينى عليها تتطلع

وقلبى جوه يتقطع

فى مشيتها

وضحكتها

تمللى ترن ف ودانى

دى اسرانى

جمال ورقه ربانى

وأه يانى

دى هبلانى

أقول يمكن تعود تانى

وتغمز تانى سنارتى

وانا ف حيرتى

لقيتها ماشيه قدامى

ف احلامى

وأوهامى

تقول للأرض اتهدى

مافيش قدى

جمال ممشوق

وكلى شوق

فى نظره ساعة ما تعدى

ولا تدرى

تكون قدرى

ياريت الحلم يتحقق

وأغمض عينى لجل احلم

يدق القلب من تانى

تروح غمزالى سنارتى

أتارى الحلو كان شابك

بسنارتى

ومن خيبتى

أقوم ناتش انا غيبتى

تروح مقطوعه سنارتى

ف نهاية الخيط كان حلم

غويـــــــــــــــــــــــــط

اتارى الحلوه دى جاره

وأنا معرفش

يا خساره

كان حلم جميل

لو يتحقق

مش راح

اصدق


=========

مع تحياتى

s@meh_415

هـــاخــدهــا غـصـــــب عـــــــــنك

يـاحـلوه إنتـى يـاللـى

يالابـسه الــطرحه توللى

عــنيكى بـتـسـبللى

وســايــقه علــينا الدلال

مـش شــايف حـد أدك

دا الــغــصن بــان دا أدك

والــورد على خــــدك

مفــيش ز يـيـــك مـــــثال

لو كـنـت شــوفــت ابوكـــى

راح اكـلم تـانـى أخـــوكــى

ولـــيا يـخطبــــوكى

يا بنــــت الـحـــــلال

وكــل يــوم يـــــعدى

أدوب يا نــــاس ف ودى

مــش لاقــى حـد أدى

يـــنول كـل الـمـــنال

أشـــوف مـشـيك يـجــنن

عـنــيكى تــقول يـحــنـن

أقــول لنـفـســى يـمــكن

أســمع رنــة خلخـــال

لو مــــــره تحنى علـــيا

بنظره حلوه ليـــــــا

وايدك لامـــــسه إيديــا

حقيقه مــــــش خيــــال

هبوســـك غصــب عنــك

وحضـــن هــاخــده منــك

وإن قلتـى لأ هـزنــك

بجــــد مــــش هـــزار

تصــرخى مــش هـسـيــــبك

تـهـربـى فــين هـجـيـــبك

أنــا مـــن نصيـــبك

طــول عـمـــرى ف انتـــظار

هـسـتــنــى كـلـمه منـــك

مقـدرش أســتغنـى عنـــك

تــروحـى بعـــيد هاجنــك

عليـــكى انا بغــــار


===================
مع تحياتى

s@meh_415

الـدلـوعــــــــــــه( الحلو شاغلنى)

الحلو شاغلنى ف بعده


ماتقوللى اعمله انا ايه


مش قادر يوفى بوعده


واحترت ياناس انا فيه


كنت ابعتله سلاماتى


يقابلنى يوماتى ويضحك


ويرد على ابتساماتى


وسايبنى باسى ف بعدك


انا مشتاقلك يا حياتى


قلبى المجروح مشتاقلك


ارحم سهدى واهاتى


وعذابى والمى وجرحك


ويوماتى افكر فيك


وانت ولا حاسس بيا


لو اقدر يوم اجافيك


حبك ما يهونش عليا


فاكر انى اراضيك


وانت ولا ساءل فيا


ادعى ربنا يهديك


ويرجع شوئك ليا

===================
مع تحياتى
محمود السخيلى
s@meh_415

5/5/2009

طظ فيـــــــــهم

طظ فيهم


طظ ليهم


طظ فِـ الِـ زعلان عليهم



دول حساله


دول زباله


دول ما حد كبير أنيهم



مهما عملو


ومهما قالو


ومهما مدو ليك اديهم



دول جزاير


صنف خاير


دول ناقصهم كعب داير



نفسى أفش غللى فيهم


نفسى اضيع نوم عنيهم


نفسى اكبدهم خساير




لو اطول احرق قلوبهم


لو بايدى انسف بيوتهم


دمى منهم محروق وفاير



طظ فيهم


طظ فـ إلـ عرفنا بيهم


طظ فـِلـ يجمعنا بيهم


طظ فيـــــــــــــــهم

================


لها بقيـــه


مع تحياتى


s@meh_415