الحشيش ضربوه فـ السوق
ما تصحى ياعم وفوق
معمول طافيه ولبانه
معجون برشام ونشوق
الحكومه ماهيش سيبانا
ورانا فـ كل مخانه
مش عايزه الشعب يروق
ودماغنا بقت خربانه
والغرزه كمان خربوها
والماشه كمان صادروها
والجوزه كسروهالنا
وحجرين تعميره خدوها
مالها الحكومه ومالنا
سيبونا ياخلق فـ حالنا
محناش ناقصين غليان
ناهبين فلوسنا ومالنا
مش لاقى انا حد كبير
فـ الدوله رئيس ووزير
أشكيله ياناس من همى
هانروح ميدان التحرير
وهنعمل ثوره كبيره
علشان سرقو التعميره
ولا فيش بانجو وحشيش
ولا تمن حشيش تصبيره
منكوم لله ياحكومه
شايفين الناس مظلومه
نازلين سرقه وتهليب
وحقوقنا كمان مهضومه
لا شغله ولا شغلانه
راح تعملو إيه ويانا
ما ينفعش معاكو الزوق
وحالتنا بقت تعبانه
واسترها يارب معانا
دى بلدنا فـ إيدنا أمانه
يانعيش فيها أحرار
يانموت فيها بكرامه
واسترها يارب معانا
دى بلدنا فـ إيدنا أمانه
يانعيش فيها أحرار
يانموت فيها بكرامه
=============
محمود السخيلى
17/4/2012