قائمة المدونات الإلكترونية

الأحد، مايو 29، 2011

تلاتيــــــــــــــــن سنه

تلاتين سنه

وانتى يامصر منهوبه ومنكوبه

ومن جواكى مسلوبه

تلاتين سنه

ولسه واقفه على رجلك

ومش همك

بيقولو ولادك وحراسك

مكتوب كدا

فى كراسك

لا

دول ناس تانيين

لهم وشين

قلوبهم قاسيه مابتحسش

مابتحبش

مخلوقه من طين

لأ

دول خفافيش

فــ الليل بتعيش

بتشرب م العروق

دمك

ولا يهمك

لحضنى يامصر راح اضمك

ولو كان التمن

نفسى

م انا ابنك

ومن صلبك

تلاتيييييين سنه

وانتى يامصر مكبوته

لا قادره تصلبى

ضهرك

وحابسه م الكلام

قهرك

وعايشه معانا

ع الكوته

تلاتييين سنه

وانا شايف ع الخدود

دمعك

صابره ع الهوان

والانين سامعك

لا بإيدى أمسح

دمعتك

ولا قادره تدارى

م العيون جرحك

الصبر طيب

وفرجه قريب

فيه رب قريب

إسمه المجيب

ها يخلص تارك

بإيد ولادك

ما عاش مين

خانك

يا بلدى الحبيب

==========

مع تحياتى
24/3/2011
محمود السخيلى
(sameh_415)