قائمة المدونات الإلكترونية

الثلاثاء، فبراير 23، 2010

حكاية أبو العربى مع الكوره

مره فـ يوم إتجنن عقلى

قلت يا واد ما تشجع كوره

قلت مافيش غير ماتش المصرى

رحت انا حاجز فـ المأسوره

أخدت معايا لبان وسودانى

وعلم المصرى وكمان صوره

طول منا ماشى أهز فـ علمى

واقول فرقتنا هى المنصوره

أصل فريقنا دا حريف كوره

فـ ارض الملعب كان اسطوره

قبل بدايه الماتش ما يبدأ

كنت مجهز علم المصرى

الفريقين نزلو فـ الملعب

إللى يسخن واللى بيجرى

حكم الملعب كان بيصفر

حط الكوره فـ خط السنتر

وبدأ الماتش بين الفريقين

ونا معرفش بشجع مين

قلت اشجع لبس المصرى

ما هى فرقتنا تساوى ملايين

لاعب لابس لبس المصرى

راح متشنكل بين إتنين

حكم الملعب راح متمطع

وحسبهالهم هو بلينتى

رحت مهييص كدا وأتنطط

واجرى بعلم المصرى بخيبتى

والمأسوره إللى انا فيها

كله قاعد كدا ومتيس

أتاريهم جمهور المصرى

لما شافونى فرحان وبهييص

إتلمو عليا وهات يا بوانى

غير شلاليط وعيال بتقرص

وطيرو منى طقم سنانى

حتى لسانى بئا متخرص

أتاريهم بدلو ملابسهم

قبل ما ينزلو ارض الملعب

ونا بغباوتى وقلة عقلى

قلت اشجع لبس الملعب

وادى جزاة اللى مالوش فيها

ليه يتجرأ يدخل فيها

وقلت توبه من دى النوبه

لو راح اشجع لعييب فيها

كلمه فـ سرك ماتقولش لحد

نفسى فـ مطش مصارعه بجد


===============
مع تحياتى

محمود السخيلى

s@meh_415


28/5/2008

أبو العربى وامن الدوله

كنت ف يوم قاعد ع القهوه

سمعت اتنين بيقولو ف سيا سه

قلت اتكلم انا وياهم

منا فهلوى تكتكه ورياسه

وهات ياكلام ع ا لحكم بتاعنا

وحكى ورغى وكتر غلاسه

وحرب وضرب صواريخ ومدافع

واغتيالات زعماء ورئاسه

ولسه هكمل تانى كلامى

والتنين قاعدين قدامى

واحد منهم قام كتفنى

والتانى راح كمم عينى

وخدونى ف تاكسى وركبنى

على فين معرفشى مودينى

ودخلت ف مبنى ماشوفتوش

وكلام كتير ما فهمتوش

والتنين كانو امن ف دوله

وانا مبسوط لسماعهم ليا

دخلت اوضه عتمه لوحدى

ودخل تانى واحد بعدى

جاب كشاف راح ضاربه ف وشى

ودا كان مين واللهى معرفشى

وهات يا سؤال وجواب مش عارف

يمكن الخبط والله انا خايف

وشحط ورايا طويل كان واقف

ايده على كتفى ليه مش عارف

وكل سؤال وجواب يدينى

ضرب ونغز كده مخلينى

متلخبط ومندى جبينى

وهو اللى مشتت تفكيرى

م الاخر خت الترييحه

م الباشه وتانى بتلفيحه

كان مالى ومال الناس ديا

منا كنت ف حالى ولا بيا

لسياسه ولا غلاسه انا مالى

من يومها وانا ماشى ف حالى

ولا عنت حاشر نفسى ف حاجه

ولا اتفلسف بعبط وسزاجه

من يومها وغويت الكوره

وف شارعى دى لعبتى مشهوره

وانا حريف وخبير معروف

ف الكوره ولا حج ضيوف

لو ما مصدق تعالا وشوف

كفايه كدا كتر خيركم

انا مشكور جدا منكم

وهحكيلكو حكايتى مع الكوره

دى حكايه جميله ومأثوره

بس انتم كدا ردو عليا

وانا اكتبها الحلقه الجايه


===========

مع تحياتى

محمود السخيلى

s@meh_415

قطــــــر الفــــــراق

كل يوم بودعه
معرفش إمتى يرجه
قطر الصعيد
ونا من بعيد
شايف عنيه مدمعه
عايز يقول أروح معاه
زى زمان
وانا كمان
عينى مخبيه الدموع
عايزه الرجوع
ساعة الوداع
لحظة فراق
والقطر ماشى دقه دقه
ونا قلبى زادت دقته
من لوعته
مليان حنين
زاد الانين
القطر زود سرعته
وعنيا نزلت دمعته
من لهفته
خايف عليه
ماسك إديه
نظرت عنيه
بتقوللى ليه
هانت عليك عشرتى
ما تسيبنى افارق دنيتى
راح الحبيب
وبقيت غريب
راجع وحيد
اجر شوقى ولهفتى
وقلبى الحزين
راجع لمين
كان نفسى القطر يرجعه
قطر الصعيد
خد الحبيب
ونا من بعيد
بودعه
نفسى اسمعه
عمال بيصرخ جوه قلبى
وبسمعه
سيبته ليه
ما ترجعه
قطر الصعيد
======
مع تحياتى
محمود السخيلى
23/2/2010