نســــــــــوان بتدلـــــــع(والله احترت)

والله احترت مع الستات

دى صبغالى الشعر بتاعها

ودي عامله فيها فيونكات

ودي شدالى الوش بتاعها

ودي عامله فيها فتكات

ست عجوزه ودي كركوبه

فاكره انها لسه شباب

عيب عليكى اختشى من نفسك

دا انتى عيالك شعرها شاب

يا حنتوسه يا منتوسه

انتى حفيدتك لسه عروسه

لابسه محزء كده وملزء

جسمك بقى تضاريس مدروسه

سيبتم إيه يا إخواننا يا بوعدا

لبنات لسه شباب وعروسه

طقم اسنانك كله اتخلع

وجسمك أصبح عضم مخلع

سيبتم إيه لبنت صغنونه

نفسها مره ف يوم تدلع

قبر يلمك انتى وهيه

نفسي جنازه عليكم تطلع

=================

مع تحياتى

محمود السخيلى

s@meh_415

5/8/2008

مين دا اللى يبيع الميه 0000 ف حاره السقايين

أول مره أحس بجهلى

ان الشعر دا ليه اوزان

واحد جانى وقاللى دا شعرك

مليان كوسه وبتنجان

يابنى روح شوفلك شغلانه

واتعلملك صنعه كمان

دى شغلتنا ودى صنعتنا

ومش حطينك فـ الحسبان

يمكن فاكر نفسه التونسى

وللا فاكر نفسه جاهين

يمكن جاى راسم ع الكرسى

ويهابش كبشه ملايين

مهو خلاص نايبك على شونه

كان قابلك جامد ومتين

قوللى الوزن دا فين يتباع

اشترى منه كيلو واتنين

قبل ما يحتكره البياع

او يحتكره ناس تانيين

انا السقا ودى مييتنا

وجاى بتبيع المييه لمين

وادى حارتنا وهناك بيتنا

وانت بتدور على مين

ما بنـأجرش 00ما بنسكنش

لو مش عاجبك دييا عيشتنا

يللا إتوكل ما تزعلنا

لو فيه كلمه حلوه تقولها

كدا هنشيلك جوه عنينا

وان ماليقتش اتمشى وغور

ومتعديش تانى مره علينا

شوفلك حاره مقطوع مييتها

وانت العارف ايه دييتها

ادى السقــــــــــــا

وادى المييـــــــــــه

وادى الحـــــــــاره

وادى قربتهـــــــــا

وادى كلامى

ودا كان رأيى

لو مش عاجبك رد علييا

ونخليها بروح رياضييه

وانا مستنى ردك لييا

ســــــــــــــــــــــــــــلام

=================

مع تحياتى

محمود السخيلى

s@meh_415

1/5/2008

عريــس الغـافله المـوكـوس(حبيبى تمللى)

حبيبى تمللى ظالمنى معاه

كل ما أهزر إيده تحوش

كل ما اقرب واخطف بوسه

كل ما اخدها ايده تلوش

والله تاعبنى تملى معاه

وكل عشمى يجى فاشوش

كنت يوماتى ف بوسه اتعشم

اجى اخدها الائى جيوش

إللى قاعدلى وإللى لازقلى

واللى عاملى فيها فلحوس

قاعدين كده لفين حوليا

ليه بس الحظ المنحوس

ابوها شغال صراف خزنه

طول ماهو قاعد يعد فلوس

طول منا قاعد اعد معاه

وهى تعد وانا مفروس

نفسى ياعالم مره ف بوسه

هو فى حب من غير بوس

وحماتى قاعده ف ريحى تتوب

وانا ابصلها قاعد مخروس

لا انا عارف اكلم صاحبتنا

ولا عارف اخطف حتتنا

وكل ما اقرب منها بتبعد

مش عارف ليه هى بتعند

سايقه التقل تمللى معايا

وعمر التقل ماكانش بيسعد

قلت اطلبها ف يوم نتفسح

ف اى مكان ونكون لواحدنا

سمعت حماتى لجوزها بتردح

ايه مش عاجبه هو ف بيتنا

لو مش عاجبه حياتنا يفلسع

وان كان عاجبه ديا عيشتنا

ومره انا ماشى لبيتنا مروح

شوفتها واقفه ويا جارتها

عمال طول السكه اتطوح

من افعالها ومن عمايلها

قلت لنفسى انا كده هتسوح

قمت انا رايح ماسك ايدها

راحت ضاربه صويت ف الشارع

قلت خلاص الموت ديتها

اتلموا عليا شباب الحاره

قلت خطيبتى ودى صاحبتها

علقه موت خدتها ف الحاره

وواقفه تزغرد مع صاحبتها

وادى جزاه اللى ما يسئلشى

قبل ما يخطب واحده تناسبه

مش راح تتعب ولا تندمشى

لو فكرت ف مين هاتناسبه

========

مع تحياتى
محمود السخيلى
24/10/2008

s@meh_415

أ ســــــف 00 حـــبـــيبتـــى (إنت اللى اخترت)

اسف حبيبتى
انت اللى اخترت انك تبعد

انت اللى اخترت انك تعند

انت اللى زمان كنت بتوعد

ان احنا هنبقى لبعضينا

كنت بتحكيلى وانا اسمعلك

كنت اشكيلك كنت ارتحلك

لما بتبعد كنت اشتقلك

اشتاق لكلامن وحكاوينا

اشتاق لأفراحنا وغناوينا

ليه حكّمت الدنيا علينا

ليه عايز كدا تنسى ماضينا

وتضيع احلامنا وامانينا

حبيبى ليه دايما قاسى

تجرحنى ف قلبى واحساسى

حبيبى خليتنى باسى

من هجرك من ظلمك ليا

ليه تحرمنى بقربى منك

عايز ليه تبعدنى عنك

فى قربى منك شوقى بيزيد

وف بعدى عنك نارى تـئــــيد

حبيبى حاسس بحب جديد

غير شعور قلبك ليا

حبيبى ليه تملى تغيب

وتسيبنى عايش وحديا

تجرحنى كتير وبتأسى كتير

وانا صابر على جرحك ليا

حبيبى كان بينا عهود

كان بينا وعود

بايدك انت الفرح يعود

وبايدك الحب يموت

صدقنى هبعد ولا اعود

انا خلاص كدا فاض بيا

بايدك تريح بالى

وف ايدك انت تزود نارى

بايدك تمسح دمعى

وبايدك تانى ترجعنى

انت اللى اخترت انك تبعد

وانت اللى اخترت انك تعند

وانا خلاص فكرت انى ابعد

ولا عدش خلاص بينا عهود

اســـــــف حـــــــــبيبتى

============مع تحياتىمحمود السخيلى

s@meh_415
25/4/2008

فــــــراق الحبـــايب(كنا حبايب)

كنا حبايب

فرقنا القدر

ياحاضر وغايب

يا اجمل بشر

طولت بعدك

مفيش حد بعدك

يداوى جروحى

يمسح دموعى

غير قلبك انت

يا أعز الحبايب

افديك بروحى

يا بلسم جروحى

فداك عمرى كله

فى حبك يهون

طول ماانت جمبى

بحس بامان

ونظره عنيك

تنسينى اللى كان

كل شيىء ما بينا

بيفكرنى بيك

اسمى واسمك

مكتوب ع الشجر

كاتبينو بادينا

منقوش ع الحجر

جوه قلب راسمه

مكتوب اسمى واسمه

على جزوع الشجر

بس ياخساره

خلاص حبيبى راح

لا عاد يفيد رجوعه

ولا يفيد النواح

نفسى يوم اشوفه

واملا عينى منه

لكن سبق قدرنا

خلاص فرق مابينا

وخد اعز الحبايب

وتواه ف التراب

خلاص ياقلبى انسى

دا كل شيىء بيأسى

الا فراق الأحباب

ال اّّه تصرخ ف قلبى

مكتومه جوه جمبى

ياأغلى حب عندى

لو كن تفيد دموعى

كان بيها ارجعك

خلاص وفيت بوعدى

وبقيت ف الدنيا وحدى

ورحت وسبتنى

لكن خلاص يادنيا

معاد لكيش امان

اخدتى منا الحبايب

وسبتيلى المكان

اواسى فيه حبيبى

وحبنا اللى كان

مع تحياتى

محمود السخيلى

s@meh_415

21/5/2008

==========

فريقنا القومى

فرقه وخلت كل الناس

تفرح تمرح فيه إحساس

حسيت إن وصلنا خلاص

فاضل خطوه نروح للكاس

كاس العالم يللا نروحله

كلمه فـ سرك إوعى تبوحله

إن فريقنا فيه أبطال

فوق أكتافنا راح ينشال

فرح كام مليون إنسان

عربى أوروبى إيش إن كان

وخللا الملعب كله نشاط

إن شاط شوطه الملعب شاط

=============

مع تحياتى

محمود السخيلى

s@meh_415

15/11/2009

محكمة بورسعيد أون لاين

ليه الغيره ماليه قلوبكم

ليه الحقد بيطغى عليه

شايف نظرة غيظ فـ عيونكم

حتى الغل إنضم إليه


فين الرأى فين الحريه

مين فيكم راح يسمع ليا

انا لو فعلا كنت منافق

كانت كل الناس حواليا


أنا لو فعلا مساح جوخ

كنت بقيت باشا ومنفوخ

بس الوحده ليا مرافق

لو حبيت اوصل راح ادوخ


مش من طبعى أضرب وابكى

واجرى بسرعه واسبق واشكى

مش فـ دماغى مين يتسابق

إنسان طبعه بيرغى ويحكى


بس انا راضى بـمين راح يحكم

وقبل ما تحكم إياك تظلم

بإيه راح تحكم برضو موافق

مـ بياخد الروح غير إلـ خالقكم


قبل ما تسمع مـ الـ بيشكى

إسمع منى ونا راح أحكى

قبل ما تظلم حد ف حكمك

ما يغركشى وهو بيبكى

==========

مع تحياتى

محمود السخيلى

s@meh_415

18/3/2010

حافظك وعارفك وفاهمك وعاجنك

حمار مأصل وناقصلك زريبه

وفيها تبرطع نجيبلك حبيبه

تنعر تجعر وتحلم خيالك

وعمال بترفص روح جاتك خيبه


حرامى مرابى وشكلك فظيع

وعمال بتعلف ف وسط القطيع

يااخى جاك موته تموت جنابك

ياطيب ياهادى ياطفل ورضيع


ص ايع وضايع وعامل دينجوان

وبترسم علينا يابن إللى كان

متزعلش منى بهزأ سيادتك

عمرك منافق وندل وجبان


إيه رماك علينا مـ كنا مرتاحين

أه لو اشوفك أشوطك باليمين

وكل شيىء هايحصل ما يخطر فـ بالك

يا أكل وشارب وضارب فـ السمين

========

مع تحياتى

محمود السخيلى

s@meh_415

17/3/2010

طنش فيه ولا تسألش

ياعم سيبك ولا تسألش

طنش وإفرح ولا تزعلش

سيبو يغور محناش ناقصينو

ولا تتعبنا ولا تتعبش

ليه راح تسأل عنه ليه

إيه كان عمله نفرح بيه

طنش وانسا مش عايزينو

يمكن مات نترحم فيه

كلمنجى وكلامه كتير

وكلامه من غير تفكير

طبعا انتم كدا عارفينو

لو ما ظهرش انا هكسر ز ير

===========

مع تخياتى

محمود السخيلى

s@meh_415

23/11/2009

قسوة أب وحزن فـ قلب

ليه تخلينى أمد إد يا

ليه تخلينى افقد اعصابى

إنتى منايا وكل ما ليا

إنتى ضنايا وكل احبابى


عمرى ما يوم زعلتك مره

مره فـ مره أدلع فيكى

ويوم ورا يوم نتفسح بره

عمرى ما أفكر ءأسى عليكى


ليه تتشاقى ويا صحابك

ليه المس بتشتكى منك

ليه تضيعى قلمك وكتابك

ليه زملاتك يبعدو عنك


حتى المس بتاعتك زعلت

جت تشكيلى كتر شقاوتك

شرح وتدريس منك تعبت

لعب وتهريج اه يغابوتك


ليه تخلينى امد اديا

ليه تخلينى افقد اعصابى

انتى منا يا وكل ما ليا

انتى ضنايا وكل اصحابى


دايما ليه تخلينى متنرفز

لما ضربتك يوم على ايدك

وافضل طول اليوم متعكنن

افتكر انى فـ يوم ما أزيتك


أسف جدا أوى يا حبيبتى

عمرى ما اطول ايدى عليكى

قبل ما تطول انا أقطعها

وامسح بيها دمع عنيكى


نفسى اشوف الضحكه فـ وشك

نفسى البسمه ترجع ليكى

ليه دايما علطول بصالى

ليه الحزن مالى عنيكى


مش راح اسامح ابدا نفسى

طول منا شايف عجز إديكى

وافضل ادعى الله فـ صلاتى

يخليكى المولى ويشفيكى




ليه تخلينى امد اديا

ليه تخلينى افقد اعصابى

انتى منايا وكل ما ليا

انتى ضنايا وكل احبابى


===================

مع تحياتى

محمود السخيلى

s@meh_415

عاشـــــــــق البحـــــــــــر

عاشـــق البحــــــر


انــــــا

عاشق البحر

مولود ف ميته

غطايا سمايا

متوسد موجته

مجدافى دراعى

وعقلى دفته

قلوعى ضلوعى

دول هما ثروتى

عاشق الشط

مدفون فى رملته

حضنانى ضمانى

دفانى بفرشته

ليلاتى يوماتى

غسلانى دمعته

وموجه ف ودانى

سحرانى ضحكته

عاشق البلاج

اتوه ف زحمته

شماسى كراسى

منصوبه ف رملته

وطفل صغير

فرحان بلعبته

بيطير طيارته

ودى كانت غيته

عاشق الشماسى

تحمينى ضلته

حراره بشراره

م الشمس بسطعته

تحت الشماسى

فارش رملته

ف ضله جميله

سحرانى نسمته

فيه حد ز يى

متهنى ف دنيته

انا البحر عشقى

ودمى مييته

وموج البحر حسى

وروحى نسمته

==============

مع تحياتى

محمود السخيلى

s@meh_415

5/5/2008

حــــــــــزين مهمــــــــوم

شايفك حزين كده ومهموم

من اسمى لو شوفته بتجرى

مش راضى ليه ترد عليا

ولا انت غيران من شعرى

ياسيدى طب عدى شويه

خايف عليك دمك يفرى

ولو كنت مكسوف متضايق

اكسر على نفسك بصله

حبة ثوانى ودقايق

برضه انت مش خسران حاجه

زوار كتير مروا عليا

وقروا اللى كاتبه انا باديا

وعجبهم كلامى وازجالى

وكتير كتير ردوا عليا

وقالولى من ده اكتب تانى

على راسى ياسيدى وعنيا

واخيرا لكم احتراماتى

وسلام كتير وتحياتى

وانتظروا منى كتاباتى

دى هتبسطكم جدا جدا

بس انتوا بقى ردوا عليا

وانا ممنون منكم جدا

============

مع تحياتى

محمود السخيلى

s@meh_415

20/4/2008

الخـــــــــاين الغــــــدار(حبيته بجد)

خاين غدار ....كداب قاسى



حبيته بجد

لحد الوقت

معرفش انا ليه


لو كان له قلب

ما كانش انطب

ولا أبكى عليه


من يوم ما اندب

ماقلش لحد

اعمل فيه ايه


وعاملى جرىء

ويقولى برىء

مرسومه عليه


خاين غدار

وعايش محتار

مسألش انا فيه


راح تبكى الدم

مكان الدمع

انت ظالمنى


خاين خداع

قلبى يتباع ؟

جرحه ألمنى


لو كان القول

زى ما بتقول

انت بايعنى


مهو طبع وفيك

وده بيخليك

بتعذبنى


بقى بعد العمر

سنين بتمر

دايما ناسى


عشت ف اوهام

وأنا كلى الام

قلبك قاسى


لو جيتنى ف يوم

ندمان مهموم

مش هسأل فيك


جرحك وداويت

عمرى وقاسيت

مش هبقى عليك


صدقنى ف يوم

لو جيت

وبكيت

مش راح أسامحك


انت الخسران

هتعيش ندمان

ويزيد جرحك


بقى قلبى تخون

حبى ويهون

جزاء اخلاصى


دنا قلبى خلاص

نسى الاخلاص

اصبح اسى


وطلعت جبان

وعامل غلبان

اتاريك خاين


علطول بتنول

زى ما بتقول

وشك باين


منك لله

فيك يوم ما انساه

وأتشفا أنا فيك


مهو كاس بيدور

وسقيتهو لى

وبكرا هيسقيك


نــــــــــــــــدل

جبــــــــــــــان

خــــــــــــاين

غــــــــــدار

كـــــــداب

قاســـــى

===============

مع تحيــــــــاتى

محمود السخيلى

s@meh_415

11/4/2008

ايام زمان كانت ميغه

محدود الدخل الملياردير


كان أيام زمان

جِدى وجِِدِك

سِتى وسِتك

البيضه بتلاته ملّيم

وازازه الزيت بتعريفه

وكيلو الرز بخمسه أبيض

ايام زمان كان خيره كتير

ومكانش حد ِاشتكى منّه

والبركه زياده وفيه توفير

والكل عايش متهنّى

والمُرَتبات دِى مانُزْكُرهَاش

كان فيها البَرَكه وناس بِتعيش

ورغيف العيش ما يتوصاش

ابيض كبير وبتعريفه

مافيهوش مصامير ولا صراصير

ولا زبل فيران ولا خيط خيشه

والكيلو اللحمه بِنُص ريال

والكيلو البورى بِنُص فِرَنك

ولاَّ الكابوريا ماتقولش عليه

من غير ميزان راح تِشْتِرى فيه

لا تقول كيماوى ولا مزارع

ولا كانش حَد بيتصارع

زَىّ النهارده وِنِتزاحم

قُدام لِـ..فرَان واقفين طوابير

ورغيف العيش كله بلاوى

وبنسمع عنه ياما حكاوى

بيقولو مُحَسَّنْ ومُمَيَّز

حتى الطِبَاقِى ما بنشوفهوش

وكتير مزارع سمكيِّه

ماليه الاسواق والجمعيه

واسعارها نار مش رمزيِّه

لو مش مصدق ادخل شوف

فى ثوانى هيجيلك ضغط

وتموت بالسكته القلبيه

والمرتبات ما مكفيه

مصاريف دروس او كليه

وعيال ياما مطالبها كتير

العيش حاف ما مكَفِّييَّه

محدود الدخل هيعمل ايه

مع المطالب اليوميه

صعبان عليَّا الموظفين

وناس كتير متدار يَّه

بين الحيطان جِوَّه البيوت

ولا حد حاسس باحوالها

غير رب كريم وغفور ورحيم

هو اللى عالم اسرارها

==============

مع تحياتى

محمود السخيلى

s@meh_415

2/4/2008

حـــد شــــــــــاف حبــــــيــــبى

ليا حبيب زعلان منى

اعمله ايه

بقاله مده غايب عنى

معرفش انا ليه

ياهلترا لسه فاكرنى

ولا ناسينى

كان كل مره

يطنشنى او يقلشنى

ويقولى برىء

اسمع كلامه

اصدقه

منا أوفـى صديق

لو جيت ف مره عشان الومه

ولا اعاتبه

يزعل منى ويعملها خصام

وافضل اصالحه

واحايله

يعمل زعلان

واراضى فيه

ومين يراضينى

والله انا غلبان

كتير كتير اترجيته

اعرف بيته

ونمرة تليفون

مش راضى حتى يطمنى

برنه تليفون

خايف ليخسرله دقيقه

برنه جريئه

تريح بالى

دنا قلبى مشغول علشانه

فين عنوانه

مايقولى عليه

اعرف منين ان كان عايش

والله انا خايف

دا شاغلنى عليه

لو حد فيكم كان عارفه

او كان شايفه

يطمنى عليه

داحبيبى وروحى

ونور قلبى

اسم الله عليه

============

مع تحياتى

محمود السخيلى

s@meh_415

2/3/2008

أخـــــرة الشـــــــهره

كان ليا صاحب

جدع مفيش منه

طول بعرض

متدلوش سنه

وسيم ورياضى

وف كل شيىء تلاقيه

اثقال وجودو

وسباحه وكراتيه

بطولات كتيره

حصد جوايزها

مراكز اولى

هو اللى فايزها

قران حديث

حافظ كتير منهم

صلاه وصوم

مؤدى فرائضهم

حتى الصلاه ف جماعه

عمره ما غاب عنهم

وكان يوم مشؤم

اتلم على شله

علمته التدخين

والبرشام والكله

وكان يوماتى يسهر

ليلاتى لحد الفجر

واهمل صلاته

لا عشه ولا فجر

حتى باب الجامع

ما بيعتبه

ولا نادى يعرف

ولا مدربه

وحالته ساءت

م الهيروين

وحقن الماكس

والكوكايين

وضاعت خلاص

شهرته

وبعدت عنه

شلته

غير الشوارع

ما لمته

وناس كتير

ليه نصحته

قبل ما يقع

فى بلوته

ويرجع تانى

لصحته

بس خلاص

فات الاوان

ولا عادش ينفع

رجعته

والسم هارى

جتته

اصبح ضعيف

اصبح هزيل

حتى المصحات

ما قبلته

ودى اخره المنجهه

واخره شهرته

=========

مع تحياتى

محمود السخيلى

s@meh_415

7/3/2008

لو دق الحب قلبى

لو دق الحب قلبى

عمره ما هيدق لغيرك

لو شافت العين غيرك انتى

عمرها ما هتعرف غيرك

من غيرك انا مش هقدر

استنى يوم واتنين

ويوماتى تملى بفكر

امتى هلاقيكى وفين

دنا رق الحب ف قلبى

يا ارق ماشافت العين

وعنيا مشتاقه تشوفك

انتى يا حلوه يا ننوسه

وتملى ف بالى هواكى

واتمنى منك بوسه

وبالح عليكى يوماتى

وانتى تقلانه عليا

ماانا عارف مش طيقانى

ولو عينك تغفل ثانيه

هخطفها واعيد من تانى

برزالتى وطوله بالك

والحاحى على اللى ف بالى

ما تحنى عليا ببوسه

ربنا يصلحلك حالك

وينوبك فيا ثواب

منا برضو هرجعهالك

انا شايف الورد

على خدودك

نفسى اخطفها

خايف لشفايفى تجرحهم

وانا بقطفها

===============

مع تحياتى

محمود السخيلى

s@meh_415

19/6/2005

المــــزاج انـــــــــــواع

ماكنتـــش اعــــرف ان المــــــزاج انــــــــــواع

فى ناس بتسمع حليم

وناس ما بتسمعشى

وناس بتفهم طلب

وناس ما بتفهمشى

وناس مزاجها عالى

من ايه ما بعرفشى

اصل المزاج انواع

على كل صنف ولون

وفيه مزاج يتباع

حسب طلب الزبون

فيه اللى بيشرب شيشه

ومغمسه بتعميره

وفيه اللى بيشرب بانجو

او يسكع بيره

وناس غاويه البرشام

ودى مزاجها تمام

ودى اخره البهدله

وف التخشيبه ينام

وفى ناس كمان سميعه

ودى عايشه ف الاوهام

مع الاغانى التافهه

عمال يسمع توهان

والبانجو دا مش بتاعى

واللى غواه الشيطان

ياخساره يازمن

ازواقنا بقت قطران

حتى المزاج انعدم

مطرب ماهوش خسران

والفن فسد عقو لنا

وبقينا فـ البواظان

وانا ما كنتش اعرف

ان المزاج انواع

وكله حسب الزبون

ليه المزاج يتباع

وعـــجــبــــــــــــــــــــى

---------------------------------

مع تحياتى

محمود السخيلى

s@meh_415

20/3/2008

نصيــــــحه للرجـــــاله( الكلمه الحلوه صدقه)

لو واحد فينا خان

بكرا هيلقى اللى يخونه

ولو واحد فينا صان

برضه هيلقى اللى يصونه

ليه انا مبقاش انسان

وله كيانه ف كل مكان

ولا الخيانه دى ف طبعنا

وضاعت الامانه من قلبنا

ليه انا اخون اللى بحبه

واجرح مشاعره وانا بقربه

واتمنى رضاه واتمنى مناه

واتمناله كل اللى يحبه

ليه احنا ما نكونش لطاف

ونسمعهم كلمه جميله

من كلمه حلوه نقولهالهم

نكسب قلوبهم وعقولهم

طب يللا جرب مره وقول

من قلبك لها انا بحبك

راح تفرشلك الارض زهور

وتشيلك جوه عنيــها

نصيحه منى اعمل بيها

الكلمه الحلوه تفرحها

وان كان فيه زعله نداريها

ولو تطلب إيه منها

تعطيلك ننى عنيها

اسمع كلامى دنا مجرب

سنين سنين ومتدرب

هديه حلوه تجيب هالها

او كلمه رقيقه تقول هالها

او مره توصف ف جمالها

حتى ان كان من ورا قلبك

دى مهما كانت ام عيالك

ولازم لها تطول بالـــــــــك

وللا نسيت ايام الصبـــــا

ايام ما كنتم مخطوبيـــــن

ما كانش حد ز ييــكم

كنتم ساعتها اجمل عروسين

نسيت خلاص لمس اديكم

وكل نظره فى عنيـــكم

وكلام كتير كنت تقوله

فى قاعده حلوه رومانسيه

انتى الجمال وانتى الدلال

وانتى المنى والحنيــــه

خليك اصيل كدا يابن الناس

وفكر كتير قبل ما تتحاس

دى شايله همومك ورزايلك

ومتنساش ان لها احساس

ومتنساش ان دى ام عيالك

ودى بعد الام اديها تنباس

قوم خد عيالك فسحهم

وفى الملاهى ومرجحهم

واوعاك ف يوم تزعلهم

لو ضاعو منك ما تعوضهم

دى مهما كان شايله همومك

وبتغسلك كل هدومك

ولقمه سخنه تطبخهالك

وهدمه جديده تجيبهالك

ولو حد مره ف يوم هانك

راح تضحى بنفسها عشانك

صدقنى مش ها تخسر حاجه

دى مهما كان ام عيالك

------------

مع تحياتى

محمود السخيلى

s@meh_415

10/2/2008

شـــــاطىء بورســـــعيد يا جــــــماله

على شط بورســــــعيد

يا محلا رملتـــــها

فى ناس كتير جايين

مشتاقه مييتها

وجوها الصافى

وحلاوه نسمتها

--------

وفى طفل صغير ع الشط

وف ايده طياره

يطول لها فى الخيط

وف ديلها سناره

وامواس كتير حاميه

تقطع اتخكها دباره

-------

وع الشط صيادين

بيشدوا ف شبكهم

واطفال كتير واقفين

بينقوا ف سمكهم

وكمان تجار جايين

يتنافسو فى مزادهم

--------

وع الرمله ناس نايمه

بتاخد حمام شمس

وفـ الميه ناس عايمه

حريفه فـ فن الغطس

ناس رايحه وناس جايه

ع الشط ما بتيأس

وناس بتلعب كوره

فايقه وما بتنعس

----------

وبتاع الخلول ياحلاوته

ف المييه ليل ونهار

ف الرمله رامى شبكته

وحواليه كبار وصغار

واقفين بيتفرجوا

شبكه من غيرسنار

وع الشط ماسك منخل

دا جد ومش بهزار

-----------

دى بورسعيد بلدى

افديها انا وولدى

يارب احميها

من شر اعاديها

ومنايا كل المنى

اموت واندفن فيها

-==========

مع تحياتى

محمود السخيلى

s@meh_415

28/2/2008

احيــــــــاء بورســــــــــعيد وشـــبابها

حى العرب ياجماله

تلقى الحبايب فيه

شبابه زى الورد

وجدعان امال ايه

لوحد كلمهم

او حد مد اديه

فى ثوانى تجمعهم

واللى انضرب نحميه

وبناتهم دى سماره

حلوه واماره

غمازه بسناره

لو تمشى ف الحاره

تهبل احسنها تخين


حى المناخ معروف

ادخل عليه وشوف

هتلاقى ناس طيبه

وناس شكلها مألوف

وشبابها محترمين

جدعان وملتزمين

فـ الفرح نحميه

والعزا نواسيه

ولو حد فكر يوم

يعمل فيها شمشوم

تلقى الشباب يتصدر

ولا عادش فيها يدوم


اما البنات ياناأه

مقدرش احكيلك

على الجمال إياه

أصبر منا هاجيلك

دا جسمها ملفوف

سبحان من صور

والشعر بضفيره

ووشها مدور

فـ خدودها غمازتين

وعليها غمزه عين

لو حد بصلها

تسحر قلوب ملايين


وحى الزهور هنقول

عـ اللى بيحصل فيه

لو كان فـ يوم تنجيد

أو كان فـ يوم زفه

هتلاقى الكل سعيد

وناس كتير واقفه

بتبارك للعروسين

ويزيد الجمال عفه

وشباب كتير جايين

وورود على كتافها

راكبين موتيسيكلات

حوالين العريس لفه


وبنات الزهور أه يانى

أصل الجمال ربانى

عيونها غيون غزلان

والكحل ربانى

وسنانها " لولى ومرجان

وخدودها " تفاح لبنانى

وفـ أخرة التنجيد

أو أخرة الزفه

العروسه للعريس

والباقى مش عارفه

===============

مع تحياتى

محمود السخيلى

s@meh_415

29/2/2008

برنامج واحد مرشـــــــــــــــــــــــــــــح

من ازجالى القديمه لبرنامج واحد مرشح نفسه فى شركه من شركات الهيئه

=============
============

انتخبونى===رشحونى

هاجبلكم الوصل المفتوح

واقفل لكم ابواب مفتوحه

وبزياده ساعات هاجيبهالكم

وساعات وياكم ممنوعه

وبدل سفر هصرفهلكم

وبدلات كتير هنشيلهالكم

هقلبلكم اللنش سفينه

واعملكم م البحر طحينه

وانا خير من يمثلكم

فى البر--- كان

او فى المينا

======

لكل واحد عربيه

وحوافزه تزيد ميه لميه

وهغرقكم بورى ومرجان

وسمك كتير ف الجمعيه

وكل مكتب فيه تكييف

وكمبيوتر من غير توليف

وهقف لكم ع الباب بواب

وافتح لكم فى البنك حساب

واعملكم مصروف للجيب

ماهى خلاص بقى تكييه

=============
============

مع تحياتى

محمود السخيلى

s@meh_415

13/10/1987

الكوســـــــــه احلا من المانجـــــه

المنتدى دا ليه مقسوم

فيه الظالم وفيه المظلوم

فى ناس بتكتب اشعارها

مش افكارها

متعرفش دا ان كان

اخبار ورق الجرنال

او نثر كاتبه اى كلام

ونقول ياسلام

ويلاقى ناس كتير

داخله وبترد عليه

مقريتش م المكتوب كلمه

ولا تعرف فيه

اكمن دا رتبته عاليه

وكتيرها عميد

والكل داخل ويجامل

ويبارك ليه

يناس كفايه كتر اونطه

هو احنا ف طنطا

دا فى ناس كتير برضه

بتعرف تكتب اشعار

مش محتاجه حد يشجعها

او يساعدها

وكفايه عليه

كتر الزوار

==========
مع تخياتى

محمود السخيلى

s@meh_415

4/3/2008

اللى انكسر يتصلح

ليه اللى انكسر يتطوح

وفى ناس محتاجه اليه

مدام نعرف نصلح

خساره ليه نرميه

ولا انت مستكفى

وعندك كتير منه

اعطف ياسيدى علينا

يمكن تعوز منه

لو فيه لحاف متقطع

او كنبه مكسوره

تلاقى فيه غلبان

فى البرد محتاج ليه

ياما ناس كتير مش لاقيه

وناس كتير مساكين

محتاجه اللى يساعدهم

بس اللى يسال فين

دا ابواب كتير مقفوله

على ناس كتير مساكين

واللى انكسر يتصلح

خساره ليه نرميه

============

مع تحياتى

محمود السخيلى

s@meh_415

26/2/2008

قليــــت بعقـــــلى وعمـــــلت بنصيـــــــحتى

قليت بعقلى

وعملت بنصيحتى

بكلمه حلوه

أقولها لذوجتى

وقلت اللى عندى

ويارتنى ماقلت

قولت اجاملها

واوصف جمالها

وبكلمه حلوه

راح اقولهالها

ياحته مارون جلاسيه

يالقمه بقلاوه

ومصدقت اخلص

من وصله المجامله

يانا ع اللى جرالى

ولا كان على بالى

سمعتنى كلام

عمرى ما سمعته

ولامتنى ملام

يـــــاريتنى ما فهمته

بقلاوةإيه

ونيله ايه

اللى بتقوللى عليه

هو انت شايفنى ايه

محل حلوانى

ياخويا اعهملها مره

وسمعنى كلمه حلوه

لا عمرك قلت بحبك

ولا قلت حتى سلامتك

وان كنت يوم تعبانه

تقوللى يللا على امك

وعلى شويه هزار منى

وحته دلع منها

ياستى انا مش قصدى

هو فيه احلى منك

ودى اخره الفهلوه

واخرتها كانت البوسه

وعلى راى مثل حلوانى

زوق البسبوسه

تلاقيها بقه عروسه

==============

مع تحياتى

محمود السخيلى

s@meh_415

24/3/2008

حـــاد ثــــه الـــــــــــــغد ر الـــغــبــيــــــــــه

يحيا الرئيس الى الابد

يحيا هو الفذ الجلد

طول عمره شايل همنا

من شيخ كبير حتى الولد

فى عهده عمل المستحيل

لجل الفقير ما يتظلم

وف حادثه الغدر الغبيه

من شويه بلطجيه

فوق السطوح

بين المبانى مداريه

وساعه ما يوصل عندهم

كانت الخيانه ف دمهم

ضرب الرصاص صوت البنادق

الكل صوب نحوهم

وف لحظه كان حرس الرئيس

اسرع واشجع منهم

وسقطوهم من ع السطوح

ولطخ المبانى دمهم

وف كلمة صدق قالها

ريسنا الله يحميه

ارجع اموت بين اهلى

ودى بلدى

انا اولى بيه

وكانت عنايه ربنا

حارسه حبيبنا كلنا

وندعيله من قلبنا

يارب إحميه لنا

================

مع تحياتى

محمود السخيلى

s@meh_415

5/3/2008

حبـــــــــيـبتى (بـورســـــــــعيد)

لو زرت بورسعيد

ومشيت ف حواريها

راح تلقى سكانها

واهل الكرم فيها

بيحبوا زوارها

حتى جواريها

وان كنت مش قادر

تقدر تعيش فيها

دا الشغل فيها كتير

بس اللى بيدور

ع الشط صيادين

ع الرزق بتدور

تسمع غناويها

والفجر بيكبر

هيلا هيلا هيلا هوب

يارب عدلها

وافرجها علينا يارب

يارب هونها

دا الشغل فيها كتير

وانت اللى مش دارى

فين الحميدى فين

فين شارع التجارى

راح تلقى البياعين

واقفه وبتنادى

ع الجيل والقمصان

والجينز وبلاطى

والفجل والرمان

والعنب البناتى

وان رحت لستثمار

صدقنى راح تحتار

شركات كتير موجوده

مين فيها اللى هتختار

واياك من التهريب

دى اهانه غير التعزيب

لو مش مصدق جرب

واستحمل بقى ياغريب

صدقنى بلدنا جميله

والخير كتير فيها

مهما اوصفلك ف جمالها

عمرى ما اوافيها

ولو جيت ف يوم ترجع

راح تلقى زكراها

معششه ف قلبك

عمرك ما تنساها

دى حبيبتى وروح قلبى

وايامها كلها عيد

مهما اوصفلك واحكيلك

دى حبيبتى بورسعيد

==========

مع تحياتى

محمود السخيلى

s@meh_415

28/2/2008

يا خـــــــــساره ياقـــــــــمر

انظر الى القمر

اقول دا مش قمرى

يا خساره ياقمر

راح فين مكان قمرى

سالت نجوم السما

فى حد شاف قمرى

لما صعبت عليهم

وملا العيون دمعى

شاورولى ف السما

بصيت لقيت قمرى

قلت كده ياقمر

يهون عليك عمرى

قالى خلاص انتهى

العمر من بدرى

وف لحظه كان اختفى

وانتهى خلاص قدرى

ولقيت نجوم السما

تعزينى فى قمرى

واشكى لمين بلوتى

يا خساره راح قمرى

وف لحظه سمعت صوت

بينادى ويكبر

اتاريه صوت الادان

ع المادنه بيكبر

ودا كان كابوس مزعج

صحيت انا منه

ونزلت اصلى الفجر

وادعى ربنا اكمنه

نجانى من حلم فظيع

كنت اشتكى منه

وانا خارج من صلاتى

ومن فرحتى بجرى

وبصيت لقيت ف السما

واقف هناك قمرى

حمدا اليك يارب

رجعتلى قمرى

==============

مع تحياتى

محمود السخيلى

s@meh_415

29/2/2008