السبت، ديسمبر 17، 2011
الثلاثاء، نوفمبر 29، 2011
اراجوز المجلس
إوعى ترشح نفسك تانى
مش عايزينك جوه المجلس
ريحتك فاحت سده ودانى
بكرا هاتيجى وهتتمحلس
كان يتمنى يبوس رجلينا
قبل إيدينا
هو فاكرها تكيية ابوه
واللى جابوه
عمال يجرى فيها ويبرطع
فاكر إنه لابد فيها
عمره ما يطلع
لأ ياضنايا لم عزالك
مع كراكيبك
مش عايزينك
شوفلك مكتب وللا زريبه
وبرطع فيها
مش انت خلاص جبت الشقه
والعربيه
سيب بقى غيرك ينزل بعدك
ما هيه تكيه
عينت ولادك حتى قرايبك
ماسكين منصب
وام محمد جارة نينتك
سلفة بنتك
عينت ولادها
والفلاح من أخر الدنيا
جه وعينتو
لجل ما يتثبت فى الشركه
ويخطب بنتو
سارح على عمال الشركه
يقول فى كلام
عمال توعدهم بحجات
ولا فى الاحلام
انسى يابابا يا ننوس عينى
ولم عزالك
مش ناقصينك يللا يافالح
كانو فاكرينك
انسان صالح
طلعت اسخن من ابليس
وعامل درويش
عمال تهلب مــ الشركه تسدد دينك
واحنا بطيابه وسزاجه
قال فهمينك
روح ياشيخ لو انت ظالمنا
يخرب بيتك
==========
محمود السخيلى
29/11/2011
الجمعة، نوفمبر 18، 2011
يا خلق صحصح
ياخلق صحصح ما تروق مش ناقصين نوم
صحصح كدا وروق بالك إصحى وفوق قوم
بلاش كسل لملم حالك عايزين فوقان
بلدنا مش ناقصه عواله فين الجدعان
تلاتين سنه شايفين الويل عايشين فى جحيم
حاكمنا ظالم مش طيب ولا قلبه رحيم
نهب فلوسنا وفلسناوشقلب حالنا
ماهو كرشه واسع ما يكفيه أكل عيالنا
عمال يبرطع شرق وغرب إله يتهد
ما هييه تكيه ووارثينها أبا عن جد
ربك بيمهل ولا يهمل حق المظلوم
من بعد ما كان حاكم أصبح محكوم
والعدل ليه ميت خالص مش سمعين صوت
عمال يأجل فى محاكمة فرعون الموت
تقولشى متعشم يورث فى التركه كمان
ماهو شعب طيب وحنين علطول غلبان
صعبان عليه نومة المخلوع المدعو جبان
عمال يمثل عــ المعاتيه وعامل عيان
إله ياشيخ تجيلك شوطه ماتقوم منها
ماتلحق تصرف فى فلوسنا..قرصك تعبان
==========
مع تحياتى
محمود السخيلى
17/11/2011
السبت، أكتوبر 22، 2011
حكومــــــــه مكســـــــورة الخـــــــاطر
مره اتنين ضايقونى ف الشارع
قلت ياواد متعبرهمش
دول صايعين مش لاقيين شغله
امشى ف حالك ماتلاغيهمش
وان كان حد اتكلم فيهم
اعمل نفسك ما سامعهمش
يمكن واحد شايل مشرط
واللا التانى ف ايده سلاح
ماهى فتونه وامور بلطجه
نازلين مرازيه ف خلق الله
لو فيه امن وظبط وربط
مش هتلاقى بلطجه من حد
ماهى حكومتنا ماهيش فاضيالنا
هى هتفضى بس لمين
مش شايفينها شايله همومنا
ونازلين هبر ف الملايين
كل فلوسنا داخله جيوبهم
شايلين هالنا للتامين
يمكن واحد فينا يتوكل
يلقى حاجه تسد الدين
والله حرام ..والنبى داحرام
مالناش حق كدا ياحرام
والله حرام احنا بنظلمهم
دول وارثينك شرع ودين
دى حكومتنا وانا عارفها
شايله همومنا ليل ونهار
اللقمه بتوفرهالنا
وتبيعلنا بالكوى والنار
انتم كده علطول ظالمينهم
مش حارمينكم غدا وفطار
كتتر خيرهم ما يسوى تعبهم
و مش لاقيين حق الكافيار
دولا ديابه وعايشه ف غابه
مش حاسين ان احنا غلابه
لو حكومتنا ف يوم بتفكر
ان الشعب بايده راح يقدر
يصنع قوته بلمسه ايده
واللى اتاخد منه يعيده
مش راح تقدر تانى تفكر
من خد حاجه تانى يعيده
مش قولتلكوا دى حكومتنا
وانتوا كدا علطول ظالمينها
---------
مع تحياتى
محمود السخيلى
s@meh_415
10/6/2009
فيـــــن الدعــــم ياهــــــــــــــو
قولولنا فين الدعم ياهوه
هو اتسرق ولا اكلتوه
دخل الكنال انتو خطفتوه
وكلام كتير انتم قولتوه
عن الميزانيه الخربانه
والمديونيه اللى ورانا
وكلام كتير نسمع عنه
دخل الكنال بيعيش منه
تلت دول والدخل كبير
لافيه بعزقه ولا فيه تبزير
والكل عايش متهنى
حتى العزول كان بيغنى
قولنا هنعمل ثورتنا
ونرجع بيها كرامتنا
ودخل الكنال يبقى ف ايدنا
ولا حد يحكم لقمتنا
ونزود الدخل القومى
ولا عدش حد يشيل همى
وخصصوا كل الشركات
حتى المصانع والتركات
والعيشه والله ما بنطيقهاش
وطلبات كتيره مابنجبهاش
وان قلت فين الدعم ياهووووووه
تلقى الحبايب جم اخدووووووه
لطال سما ولا حتى سابوه
وان حد قال لأ إعتقلوه
حتى الدقيق ده هيغلوه
لا عاد فطير ولا حتى جاتوه
حتى الموظف هيخلوه
يلطم ويصرخ يانا ياهووووووووه
فين المرتب ... فين المصاريف
مش لاقى أأكل ابنى رغيف
وان قلنا فين الدعم ياهووووه
يقولولنا يللا انتو لهفتوووه
طرق كبارى احنا بنينا
وكمان مبانى وعلينا
ما كفايه بقى ضحك علينا
هو احنا كنا استكفينا
وشباب كتيييير قاعد صاااايع
على القهاوى كده وضايع
مش لاقى حد يشغلهم
ولا حتى حد ياخد ايدهم
ولو فيه مسابقه لوظيفه
تلقى الشباب جاى بالزوفه
لكن الوظيفه دى محجوزه
لناس لها واسطه ولها كوسه
اما افقير دا يغور ويموت
وان شالله حتى ان كان مسنود
هو الفقير طول عمره فقير
ياخدله ضربه وكام شلوط
اصل الفقير دايما مظلوم
والظلم دا عمره ما بيدوووم
======
مع تحياتى
محمود السخيلى
s@meh_415
20/4/2008
الجمعة، أكتوبر 07، 2011
طلقت خلاص البانجو
طلقت خلاص البانجو
===========
طلقت خلاص البانجو
وبطلت اشرب فى حشيش
وادعى ربنا يهدينى
لا الصحه تروح ماتجيش
طلقت خلاص البانجو
خلاص مش هشرب بانجو
ولا احط سيجاره فى بوقى
بطلت اسكر فى بولاق
ولا احشش تانى فى الدقى
طلقت خلاص البانجو
ولا الف حشيش فى سيجاره
ولا واقفه فى ناصيه حاره
ولا امشى واعاكس جاره
واجرى واسعى على رزقى
بطلت خلاص البانجو
مش هسهر تانى فى مخانه
ولا اعدى ف يوم على غرزه
وكامان هشترى دكانه
واعزم اورتيجا ووزه
طلقت خلاص البانجو
ولا هاشرب تانى افيون
ولا اعاكس ف التليفون
ولصاحبى عمرى ما اخون
واعزمه على بطه ووزه
طلقت خلاص البانجو
وبطلت انا شرب حشيش
============
مع تحياتى
محمود السخيلى
s@meh_415
28/4/2011
الى اللقاء مع
ماشه وشيشه وتمن حشيش
الخميس، سبتمبر 29، 2011
بانوراما الشاطىء وام الصوى
حضراتكم طبعا عرفين مين تبقى( ام الصى) اللام القمريه ضم الصاد وتشديد الياء
وطبعا كل واحد بورسعيدى لازم يكون سمع الشريط بتاع ام الصى وام الصى النهارده على البلاج فى شم النسيم هى وجارتها والصى ابنها والعيله....وتعالو بينا نشوف ايه اللى هيحصل منهم على البلاج
( ست طيبه ومحبوبه وعلى نياتها ومن حى شعبى)
===================
بتاع الشماسى وام الصى
بتاع الشماسى :- شمسيه ياهانم خيمه يابيه
بتمن كراسى وترابيزه عليه
أم الصوى:- طيب تعالا هاتلنا خمتين
وافتحلنا على بعض اتنين
بياع العرقسوس وام الصى وابنها الصى
الصوى:- ياعم يبتاع العرقسوس
من فضلك ادينى كبايه
طب يلا خدلك واحده وغور
ومعدش فيه تانى ويايا
الصوى:- ياعم لسالى كبايه
وللا انت هتعملها حكايه
بياع العرقسوس:- اتمشى يابنى الله يهديك
لا أنا عايز اضربك.. ولا عايز أأزيك
أم الصوى :- مالك ومال الواد دا ابنى
واللا انت عمرك مستغنى
بياع اعرقسوس:- هو انتى ياست دا يبقى ابنك
اتارى فيه شبه منك
خدلها كبايه كمان تانى
وقولها تكون كده عزرانى
يرحم زمانها وزمانى
دا كان حبيبى الاولانى
بياع غزل البنات وام الصى وابنها
بياع غزل البنات:- غزل البنات ياحلاوه
سكر نبات يانقاوه
الصوى:- ياعم هاتلى تلات تكياس
تلاته بربع يا اما بلاش
بياع غزل البنات:- ع الصبح كده جاى بتفاصل
وللا انت كده تحصيل حاصل
أم الصوى:- ياعم اديله زى ما بيقول
وللا انت كده دايما على طول
بياع غزل البنات:- ياستى واللهى هنخسر
مش عارفه ان غلا السكر
أم الصوى:- منهم لله كل التجار
بيغلو الحاجه بالغلا والنار
حتى الرز بتاع التموين
كله زباله ومليان طين
الصوى وصاحبه بيعاكسو البناتع البلاج
الصوى:-شايف البنتين اللى هناك دول
جايين علينا نلاغيهم
صاحب الصوى:-اسكت يا عم ومتشاورش
اللى جامبيك دول اهاليهم
بتطل معاكسه االله يخليك
وللا انت نسيت اللى جرالك
لما كنا على الكونيش
والكلب راح عض ( دراعك)
ويومها روحنا المستشفى
كانت فضيحه والناس شايفه
الصوى:-اسكت يا عم ما تفكرنيش
دنا كنت غرقان فى هدومى
حتى التمريض .. ما سابونيش
تريقه مع ضحك وكسفونى
بتاع السميط وابو الصى
بياع السميط:- سميط وبيض وجبنه
ودقه فطره سوخنه
أبو الصوى:- ياعم يابتاع السميط
من فضلك ادينى سميطه
وزودلى الدقه شويه
وحطلى كمان كام بيضه
بياع السميط:- على عينى وراسى يا استازنا
ف ثوانى هجهزلك طلبك
اتفضل انت اقعد وارتاح
وانا اجيبهالك لغايه عندك
بياع الكازوزه وابو الصى
بياع اكازوزه:- قهوه شاى كازوزه
قهوه شاى حاجه ساقعه
أبو الصوى:- تعالا هاتلنا براد شاى
ومتنساش الميه الساقعه
بياع الكازوزه:- حاضر يابيه ثوانى وجاى
فيه ناس كتير جاييه وواقعه
بتاع الخلول وام الصى وصاحبتها
أم الصوى:- بتاع الخلول هناك اهه
ماتيجى نروح نتسلى عليه
وللا انتى خايفه ليضربنا
جارة أم الصوى :-وهو البوليس دا بيعمل ايه
ام الصوى:- ياعم يبتاع الخلول
عندك خلول حلوه كبيره
بياع الخلول:- ايوا يا ست منتوش شايفين
ع الارض فيه كومه كتيره
أم الصوى:- طب هاتلنا شويه كده وقول
بكام هتكون التسعيره
بياع الخلول:- ياست خلاص من غير فلوس
دا الصى صاحبى وانتم جيره
بتاع التين والصى وامه
بياع التين :-ايوا ياتين ياعسل ياتين
يابتاع العصارى ياحلو ياتين
أم الصوى:- عم ياللى ماشى بكام التين
بياع التين:- عندى بربع جنيه لتنين
أم الصوى:- ممكن انقى ولا بلاش
بياع التين:- ياستى تعالى وخدى ببلاش
أم الصوى:- مهو سعرك ده ماينفعناش
وانت باين عليك حناش
هتعطينى الكام تينه بجنيه
ببياع التين:- ياللا الخمسه بنص جنيه
وانت عايز كام تينه يابيه
بتاع الشماسى وام الصى وجارتها
أم الصوى:- بتاع الشماسى جاى علينا
طنشى واعملى منتيش شيفاه
بيلم الشماسى من حوالينا
وان جه علينا نعملها معاه
بتاع الشماسى:- خلاص ياستى شطبنا
بنلم الشماسى واخيامنا
أم الصوى:- استنى ياسيدى مستعجل ليه
وللا انت عايز تتشاكل
بتاع الشماسى:- حرس الحدود جاى هيعدى
واحنا مش وش مشاكل
أم الصوى:- طيب ياخويا متزعقش
سايبينلك الحته وماشيين
قومى ياللا ياختى نتمشى
ونقعد شويه على الكورنيش
ونشترى اكل... ونتعشى
ونروح ع البيت تانى ومنجيش
===========
مع تحياتى
محمود السخيلى
s@meh-415
20/4/2008
الاشتراك في:
الرسائل (Atom)